श्रीरामपूर | प्रतिनिधी
आषाढी वारीनिमित्त पंढरपूरच्या दिशेने पायी निघालेल्या वारकरी बांधवांसाठी वारकरी सेवा समितीच्या वतीने “माऊलींची पदसेवा” हा सामाजिक उपक्रम राबविण्यात आला. अभाविपच्या माजी कार्यकर्त्यांनी स्थापन केलेल्या या समितीमार्फत गेल्या चार वर्षांपासून श्रीरामपूर येथे वारकऱ्यांसाठी वैद्यकीय शिबिर आणि पदसेवेचे आयोजन करण्यात येत आहे.
यंदाही श्रीरामपूर येथे आयोजित करण्यात आलेल्या वैद्यकीय शिबिरात शिवा ट्रस्ट मेडिकल महाविद्यालयाशी संलग्न वडाळा महादेव व पाचेगाव येथील पवार महाविद्यालयातील सुमारे २०० वैद्यकीय विद्यार्थ्यांनी सहभाग घेतला. विद्यार्थ्यांनी सुमारे १,५०० वारकरी बांधवांची आरोग्य तपासणी करून आवश्यक वैद्यकीय सेवा दिली. तसेच दीर्घ पायी प्रवासामुळे पाय दुखणाऱ्या वारकऱ्यांची पदसेवा करून त्यांना दिलासा दिला.
या शिबिराला शिवा ट्रस्टचे दिलीप पवार, राष्ट्रीय स्वयंसेवक संघाचे माजी जिल्हा संघचालक किशोर निर्मळ, मेडिकल असोसिएशनचे आनंद कोठारी यांच्यासह विविध मान्यवरांनी भेट देत उपक्रमाचे कौतुक केले.
कार्यक्रमाच्या यशस्वी आयोजनासाठी वारकरी सेवा समितीचे प्रथमेश जोशी, तेजस उंडे, योगेश पतंगे, प्रतिक लगे, अभिषेक फुनगे, प्रथमेश पांडे आणि निरंजन गाडे यांनी विशेष परिश्रम घेतले.
वारकऱ्यांच्या सेवेसाठी राबविण्यात आलेल्या या उपक्रमाचे वारकरी तसेच नागरिकांकडून कौतुक करण्यात आले.
