प्रतिनिधी
नाशिक जिल्ह्यातील नायगावची भूमिकन्या आणि एचपीटी महाविद्यालयाची विद्यार्थिनी श्रावणी सचिन सांगळे हिने 23 वर्षांखालील आशियाई ॲथलेटिक्स अजिंक्यपद स्पर्धेत शानदार कामगिरी करत दोन सुवर्ण आणि एक कांस्यपदकाची कमाई केली आहे. तिच्या या उल्लेखनीय यशामुळे नाशिक जिल्ह्याच्या शिरपेचात आणखी एक मानाचा तुरा खोवला गेला आहे.
श्रावणीने स्पर्धेतील मिक्स्ड रिले प्रकारात भारतीय संघाचे प्रतिनिधित्व करत दमदार कामगिरीच्या जोरावर सुवर्णपदक पटकावले. त्यानंतर महिला ४×४०० मीटर रिले स्पर्धेतही भारताला सुवर्णपदक मिळवून देण्यात तिने मोलाची भूमिका बजावली.
याशिवाय, ४०० मीटर अडथळा शर्यतीत वैयक्तिक गटात उत्कृष्ट प्रदर्शन करत तिने कांस्यपदक जिंकले. एका स्पर्धेत दोन सुवर्ण आणि एक कांस्य अशी तिहेरी पदकांची कमाई करून श्रावणीने भारतीय ॲथलेटिक्समध्ये आपली वेगळी ओळख निर्माण केली आहे.
श्रावणीच्या या ऐतिहासिक कामगिरीचे सर्व स्तरांतून कौतुक होत असून तिच्या यशामुळे नाशिक जिल्ह्याच्या क्रीडा परंपरेत आणखी एका सुवर्ण अध्यायाची भर पडली आहे. तिची ही कामगिरी राज्यातील आणि देशातील युवा खेळाडूंसाठी प्रेरणादायी ठरत आहे.
