चक पिरंजी येथे कायदेविषयक जनजागृती शिबिर उत्साहात संपन्न

सावली | प्रतिनिधी

महाराष्ट्र राज्य विधी सेवा प्राधिकरण, मुंबई व जिल्हा विधी सेवा प्राधिकरण, चंद्रपूर यांच्या निर्देशानुसार तसेच तालुका विधी सेवा समिती, सावली यांच्या वतीने NALSA च्या किमान समान कार्यक्रमांतर्गत जि. प. उच्च श्रेणी प्राथमिक शाळा, चक पिरंजी येथे कायदेविषयक जनजागृती शिबिर उत्साहात पार पडले.

शिबिराच्या अध्यक्षस्थानी मा. आदित्य अजय चव्हाण, दिवाणी न्यायाधीश (कनिष्ठ स्तर) तथा न्याय दंडाधिकारी प्रथम वर्ग व अध्यक्ष, तालुका विधी सेवा समिती, सावली उपस्थित होते. त्यांनी विद्यार्थ्यांना बालसंरक्षण, शिक्षणाचे महत्त्व, कायद्याचे पालन आणि मोफत कायदेशीर सहाय्य याविषयी मार्गदर्शन केले.

यावेळी तालुका बार असोसिएशनचे अध्यक्ष अॅड. बी. टी. लाडे यांनी पॉक्सो कायदा, शिक्षणाचा अधिकार, बालहक्क, बालविवाह प्रतिबंध, बालमजुरी निर्मूलन तसेच शासनाच्या विविध योजनांची सविस्तर माहिती दिली. अॅड. आदर्श गेडाम यांनी बालहक्कांचे संरक्षण आणि कायदेविषयक जनजागृतीचे महत्त्व अधोरेखित केले.

या कार्यक्रमास गटविकास अधिकारी श्री. कोमलवार, पोलीस उपनिरीक्षक श्री. तिजारे, चक पिरंजीचे सरपंच, सौ. गेडाम मॅडम, तालुका विधी सेवा समितीचे सदस्य डॉ. शडाकांत कवठे, शिक्षकवृंद, ग्रामस्थ, पालक, विद्यार्थी तसेच तालुका बार असोसिएशनचे पदाधिकारी व सदस्य मोठ्या संख्येने उपस्थित होते.

कार्यक्रमाच्या शेवटी डॉ. शडाकांत कवठे यांनी उपस्थितांचे आभार मानले. विद्यार्थी, पालक आणि ग्रामस्थांच्या उत्स्फूर्त प्रतिसादामुळे शिबिर यशस्वीरीत्या पार पडले. शिबिरातून विद्यार्थ्यांमध्ये कायद्याविषयी जागरूकता निर्माण करण्याबरोबरच त्यांच्या हक्क व कर्तव्यांविषयी महत्त्वपूर्ण मार्गदर्शन करण्यात आले.