निफाड | प्रतिनिधी
NASSCOM Foundation, महाराष्ट्र राज्य ग्रामीण जीवनोन्नती अभियान (MSRLM-उमेद), निफाड यांच्या सहकार्याने आणि YouthAid Foundation यांच्या माध्यमातून राबविण्यात येणाऱ्या ‘Super 300 Project’ अंतर्गत महिला उद्योजिकांसाठी तीन दिवसीय उद्योजकता विकास प्रशिक्षण कार्यशाळा उत्साहात पार पडली. 14 ते 16 जुलै 2026 या कालावधीत पंचायत समिती सभागृह, निफाड येथे आयोजित या प्रशिक्षणाला महिला उद्योजिकांचा उत्स्फूर्त प्रतिसाद लाभला.
या प्रशिक्षणाचा मुख्य उद्देश महिला उद्योजिकांना आधुनिक तंत्रज्ञानाची जोड देत त्यांचा व्यवसाय अधिक सक्षम, स्पर्धात्मक आणि शाश्वत बनविणे हा होता. कार्यशाळेत डिजिटल मार्केटिंग, ब्रँडिंग, सोशल मीडिया मार्केटिंग, ऑनलाइन व्यवसाय विस्तार, ग्राहक व्यवस्थापन, डिजिटल पेमेंट्स, व्यवसाय नियोजन, उत्पादन किंमत निर्धारण तसेच कृत्रिम बुद्धिमत्ता (AI) आधारित व्यवसाय साधनांचा प्रभावी वापर या विषयांवर सविस्तर मार्गदर्शन करण्यात आले.
समारोप कार्यक्रमास मा. नम्रता जगताप (गटविकास अधिकारी, पंचायत समिती निफाड), श्री. योगेश पाटील (व्यवस्थापकीय संचालक, WashMitra) आणि श्री. नितीन कापुरे (तालुका अभियान व्यवस्थापक, MSRLM-उमेद) हे प्रमुख पाहुणे म्हणून उपस्थित होते. मान्यवरांनी बदलत्या डिजिटल युगात महिला उद्योजिकांनी तंत्रज्ञानाचा स्वीकार करून आत्मनिर्भरतेच्या दिशेने आत्मविश्वासाने वाटचाल करण्याचे आवाहन केले.
प्रशिक्षणाचे मार्गदर्शन शिवाजी परमार (YEFi, जिल्हा समन्वयक – नंदुरबार) आणि हर्ष फपाळ (YEFi, जिल्हा समन्वयक – नाशिक) यांनी केले. त्यांनी आधुनिक डिजिटल साधनांचा वापर, ऑनलाइन विक्री, व्यवसाय व्यवस्थापन, आर्थिक साक्षरता आणि AI चा व्यवसायातील प्रभावी वापर याबाबत प्रत्यक्ष प्रात्यक्षिकांसह मार्गदर्शन केले.
या प्रशिक्षणामुळे महिला उद्योजिकांना डिजिटल माध्यमांचा प्रभावी वापर करून व्यवसायाचा विस्तार करण्यासाठी आवश्यक कौशल्ये प्राप्त झाली असून, बदलत्या बाजारपेठेच्या गरजांनुसार व्यवसाय अधिक सक्षम करण्याचा आत्मविश्वासही निर्माण झाला आहे.
आयोजकांनी सांगितले की, ‘Super 300 Project’ अंतर्गत भविष्यातही नाशिक जिल्ह्यातील महिला उद्योजिकांसाठी कौशल्यविकास, डिजिटल सक्षमीकरण, व्यवसाय मार्गदर्शन आणि बाजारपेठेशी जोडणारे विविध उपक्रम सातत्याने राबविण्यात येणार आहेत.
