करमाळा | प्रतिनिधी :
संतश्रेष्ठ श्री निवृत्तीनाथ महाराज पालखी सोहळ्याचे करमाळा तालुक्यात भक्तीमय वातावरणात उत्साहाने स्वागत करण्यात आले. तालुक्याच्या सीमेवर प्रशासनाच्या वतीने तहसीलदार शिल्पा ठोकडे यांनी पालखीचे स्वागत करून दर्शन घेतले.
यावेळी तहसीलदार शिल्पा ठोकडे यांनी केवळ स्वागत न करता वारकऱ्यांसोबत काही अंतर पायी चालत पालखी सोहळ्यात सहभाग घेतला. विठ्ठलनामाच्या गजरात आणि टाळ-मृदंगाच्या निनादात त्यांनी वारकऱ्यांशी संवाद साधत त्यांच्या भावना जाणून घेतल्या.
तसेच पालखी सोहळ्यासाठी प्रशासनाकडून करण्यात आलेल्या पिण्याचे पाणी, आरोग्य सेवा, स्वच्छता, वाहतूक आणि इतर मूलभूत सुविधांची पाहणी करून संबंधित अधिकाऱ्यांना आवश्यक सूचना दिल्या.
तहसीलदारांनी वारकऱ्यांसोबत पायी प्रवास केल्याने भाविकांमध्ये आनंदाचे वातावरण निर्माण झाले. यावेळी महसूल विभागाचे अधिकारी, कर्मचारी तसेच मोठ्या संख्येने वारकरी आणि भाविक उपस्थित होते.
