पिंपरी-चिंचवड | प्रतिनिधी
पिंपरी-चिंचवड महापालिका प्रभाग क्रमांक १ मधील यशवंत कॉलनीसमोरील सार्वजनिक शौचालयाची पाईपलाईन फुटल्याने सांडपाणी रस्त्यावर वाहत होते. त्यामुळे परिसरात दुर्गंधी पसरून नागरिकांच्या आरोग्याचा प्रश्न निर्माण झाला होता. याबाबत स्थानिकांनी तक्रार केल्यानंतर नगरसेविका सौ. संगीता नानी प्रभाकर ताम्हाणे यांनी तात्काळ दखल घेत संबंधित ठिकाणी भेट देऊन पाहणी केली.
पाहणीदरम्यान शौचालयाची पाईपलाईन फुटल्याचे स्पष्ट झाल्यानंतर त्यांनी महापालिकेच्या संबंधित विभागाशी संपर्क साधून पाईपलाईन बदलण्याचे काम युद्धपातळीवर सुरू करण्याच्या सूचना दिल्या.
दुरुस्तीचे काम सुरू झाल्यानंतर नगरसेविका संगीता ताम्हाणे यांनी पुन्हा प्रत्यक्ष स्थळी जाऊन कामाची पाहणी केली. यावेळी काम दर्जेदार, पारदर्शक आणि निर्धारित वेळेत पूर्ण करण्याबाबत संबंधित अधिकाऱ्यांना आवश्यक सूचना देण्यात आल्या.
यावेळी बोलताना नगरसेविका संगीता ताम्हाणे म्हणाल्या, “नागरिकांना स्वच्छ, सुरक्षित आणि आरोग्यदायी वातावरण मिळावे, यासाठी अशा प्रत्येक समस्येवर तत्परतेने कार्यवाही करणे हेच माझे कर्तव्य आहे.”
या तातडीच्या कारवाईमुळे स्थानिक नागरिकांनी समाधान व्यक्त करत नगरसेविकांचे आभार मानले.
