धाड | प्रतिनिधी
धाड पोलीस स्टेशनच्या हद्दीतील वॉर्ड क्रमांक ५, नसीब नगर येथे सार्वजनिक वितरण प्रणाली (रेशन) मधील तांदळाची अवैध वाहतूक होत असल्याची गोपनीय माहिती मिळाल्यानंतर पोलिसांनी धाड टाकून मोठी कारवाई केली. या कारवाईत 41 क्विंटल 63 किलो सरकारी रेशनचा तांदूळ आणि एक आयशर मालवाहू वाहन जप्त करण्यात आले.
प्रभारी अधिकारी सहायक पोलीस निरीक्षक अजिनाथ मोरे यांच्या मार्गदर्शनाखाली हेड कॉन्स्टेबल रविंद्र चव्हाण, श्रीकृष्णा चव्हाण आणि पोलीस कॉन्स्टेबल भगवान खमाटे यांनी शासकीय वाहनाने घटनास्थळी जाऊन ही कारवाई केली.
पोलिसांनी आयशर कंपनीचे विक्टरी रंगाचे वाहन (क्र. MH-04-BG-6022) तपासले असता त्यामध्ये 84 पोत्यांमध्ये एकूण 4,163 किलो (41 क्विंटल 63 किलो) सरकारी रेशनचा तांदूळ आढळून आला. जप्त तांदळाची अंदाजे किंमत ₹41,600, तर वाहनाची किंमत ₹3 लाख असून, एकूण ₹3 लाख 41 हजार 600 रुपयांचा मुद्देमाल जप्त करण्यात आला.
प्राथमिक चौकशीत हे वाहन सलीम खान युसुफ खान (वय 42, रा. वॉर्ड क्र. 5, नसीब नगर, धाड) यांच्या मालकीचे असल्याचे समोर आले. तांदूळ सार्वजनिक वितरण प्रणालीतील असल्याचा संशय आल्याने पंचनामा करून तांदूळ व वाहन जप्त करण्यात आले आणि पुढील चौकशीसाठी धाड पोलीस ठाण्यात आणण्यात आले.
या प्रकरणी पुढील तपास व कायदेशीर कारवाईसाठी तहसीलदार, बुलढाणा यांच्याकडे अहवाल पाठविण्यात आला होता. त्यांच्या अहवालानुसार अत्यावश्यक वस्तू अधिनियम, 1955 मधील कलम 3 व 7 अन्वये धाड पोलीस स्टेशनमध्ये गुन्हा दाखल करण्यात आला असून, पुढील तपास सुरू आहे.
