धाड | प्रतिनिधी
धाड पोलीस स्टेशनच्या हद्दीतील देवपूर शिवारात सुरू असलेल्या जुगार अड्ड्यावर पोलिसांनी छापा टाकून सात जणांविरुद्ध कारवाई केली. या कारवाईत रोख रक्कम आणि ताशपत्त्यांसह ₹६,१५० किमतीचा मुद्देमाल जप्त करण्यात आला.
पोलीस स्टेशन धाडला देवपूर शिवारात काही व्यक्ती ताशपत्त्याच्या सहाय्याने पैशांचा जुगार खेळत असल्याची गोपनीय माहिती मिळाली होती. त्यानुसार दि. १९ जुलै २०२६ रोजी सायंकाळी ५.१० ते ५.४५ या वेळेत पंचांसमक्ष पोलिसांनी छापा टाकला.
कारवाईदरम्यान एकूण ७ आरोपींवर कारवाई करण्यात आली. त्यांच्या ताब्यातून ५२ पत्त्यांचा एक कॅट (किंमत ₹५०) तसेच अंगझडतीत मिळालेली ₹६,१०० रोख रक्कम असा एकूण ₹६,१५० किमतीचा जुगाराचा मुद्देमाल जप्त करण्यात आला.
या प्रकरणी धाड पोलीस स्टेशन येथे गुन्हा क्रमांक २८६/२०२६ नोंदविण्यात आला असून महाराष्ट्र जुगार प्रतिबंधक अधिनियमाच्या कलम १२(अ) अन्वये गुन्हा दाखल करण्यात आला आहे. या प्रकरणाचा पुढील तपास सुरू आहे.
दरम्यान, सार्वजनिक ठिकाणी अथवा बेकायदेशीररित्या जुगार खेळणे किंवा खेळविणे हा कायद्याने दंडनीय गुन्हा असल्याचे पोलिसांनी स्पष्ट केले असून, अशा प्रकारची माहिती नागरिकांनी तात्काळ पोलिसांना द्यावी, असे आवाहन करण्यात आले आहे.
