आळंदी म्हातोबा | प्रतिनिधी
आळंदी म्हातोबा येथील श्रीनाथ म्हातोबा विविध कार्यकारी सेवा सहकारी सोसायटीच्या चेअरमनपदी ज्ञानोबा माऊली शंकर शिवरकर यांची सर्वानुमते बिनविरोध निवड करण्यात आली. निवडणूक निर्णय अधिकाऱ्यांच्या देखरेखीखाली संस्थेच्या कार्यालयात पार पडलेल्या विशेष सभेत या निवडीची अधिकृत घोषणा करण्यात आली.
नवनियुक्त चेअरमन ज्ञानोबा माऊली शिवरकर यांच्या निवडीबद्दल त्यांचा भव्य नागरी सत्कार करण्यात आला. यावेळी कृषी उत्पन्न बाजार समितीच्या उपसभापती मनीषाताई शंकर नानासाहेब पदे, पुणे जिल्हा नियोजन समितीचे सदस्य दिलीप नाना वाल्हेकर, हवेली तालुका राष्ट्रवादी काँग्रेसचे ज्येष्ठ नेते तथा अध्यक्ष भगवान अण्णा जवळकर, अशोक भाऊ जवळकर, अरविंद शिवरकर, सोसायटीचे सचिव विवेक ठोंबरे, निवडणूक निर्णय अधिकारी सोनाली देसाई तसेच पंचायत समिती हवेलीचे पदाधिकारी आणि अन्य मान्यवर उपस्थित होते.
यावेळी उपस्थित मान्यवरांनी नवनियुक्त चेअरमन व संचालक मंडळाला शुभेच्छा देत संस्थेच्या माध्यमातून शेतकऱ्यांच्या हिताचे निर्णय घेतले जातील आणि सोसायटीची प्रगती अधिक वेगाने होईल, असा विश्वास व्यक्त केला.
सत्काराला उत्तर देताना नवनियुक्त चेअरमन ज्ञानोबा माऊली शंकर शिवरकर यांनी, “शेतकऱ्यांच्या अडचणी सोडविणे, विविध कर्ज योजनांचा लाभ तळागाळातील सभासदांपर्यंत पोहोचविणे तसेच संस्थेचा कारभार अधिक पारदर्शक, गतिमान आणि लोकाभिमुख करणे हीच आपली प्रमुख प्राथमिकता असेल. सर्वांना सोबत घेऊन संस्थेच्या प्रगतीसाठी कटिबद्धपणे काम करू,” अशी ग्वाही दिली.
या निवड प्रसंगी गावातील विविध क्षेत्रांतील मान्यवर, आजी-माजी पदाधिकारी, सोसायटीचे संचालक, सभासद आणि ग्रामस्थ मोठ्या संख्येने उपस्थित होते. ज्ञानोबा माऊली शंकर शिवरकर यांच्या बिनविरोध निवडीबद्दल आळंदी म्हातोबा परिसरातून त्यांच्यावर अभिनंदनाचा वर्षाव होत आहे.
