राजेवाडी (पुणे) | प्रतिनिधी
“रक्त नाड्यांमध्ये वाहावे, नाल्यांमध्ये नाही” हा मानवतेचा संदेश देत संत निरंकारी चॅरिटेबल फाउंडेशनतर्फे राजेवाडी येथील संत निरंकारी सत्संग भवन येथे भव्य रक्तदान शिबिराचे आयोजन करण्यात आले. या उपक्रमाला परिसरातील नागरिकांनी मोठ्या संख्येने उपस्थित राहून उत्स्फूर्त प्रतिसाद दिला.
मानवी कल्याण आणि आपत्कालीन परिस्थितीत गरजू रुग्णांना वेळेवर रक्त उपलब्ध व्हावे, या उद्देशाने आयोजित करण्यात आलेले हे शिबिर सकाळी ९ ते सायंकाळी ५ वाजेपर्यंत पार पडले. शिबिरात अनेक युवक, महिला आणि ज्येष्ठ नागरिकांनी स्वयंस्फूर्तीने रक्तदान करत सामाजिक बांधिलकी जपली.
निरंकारी मिशनच्या सेवादलाने संपूर्ण शिबिराचे नियोजन आणि व्यवस्थापन अत्यंत शिस्तबद्ध पद्धतीने केले. रक्तदान करणाऱ्या सर्व रक्तदात्यांचा प्रमाणपत्र देऊन सन्मान करण्यात आला.
या उपक्रमामुळे गरजू रुग्णांचे प्राण वाचविण्यास मोठी मदत होणार असून, संत निरंकारी मंडळाच्या या समाजोपयोगी कार्याचे राजेवाडी परिसरातून सर्वत्र कौतुक करण्यात येत आहे.
