नांदेड | प्रतिनिधी
राज्यात सातत्याने घडणाऱ्या पेपरफुटीच्या घटनांचा तसेच आंदोलन करणाऱ्या विद्यार्थ्यांवरील कथित लाठीचार्जचा निषेध करत मुखेड तहसील कार्यालयासमोर विविध संघटना आणि सर्वपक्षीय कार्यकर्त्यांनी जोरदार निदर्शने केली. यावेळी शिक्षण व्यवस्थेतील गैरप्रकारांवर कठोर कारवाई करण्यासह शिक्षणमंत्र्यांनी नैतिक जबाबदारी स्वीकारून राजीनामा द्यावा, अशी मागणी करण्यात आली.
आंदोलकांनी सांगितले की, वारंवार होणाऱ्या पेपरफुटीच्या घटनांमुळे प्रामाणिकपणे अभ्यास करणाऱ्या लाखो विद्यार्थ्यांच्या भविष्यावर प्रश्नचिन्ह निर्माण झाले आहे. परीक्षेतील गैरप्रकारांमुळे विद्यार्थ्यांमध्ये नैराश्य वाढत असून शासनाने याकडे गांभीर्याने लक्ष देण्याची गरज आहे.
तहसील कार्यालयासमोर झालेल्या आंदोलनात विद्यार्थ्यांवरील कथित लाठीचार्जचा निषेध करण्यात आला. आंदोलनकर्त्यांनी ही घटना लोकशाही मूल्यांना धक्का देणारी असल्याचे सांगत संबंधित दोषींवर कठोर कारवाईची मागणी केली.
यावेळी स्वाभिमानी शेतकरी युवा संघटनेचे मराठवाडा अध्यक्ष शिवशंकर पाटील कलंबरकर यांनी, “पेपरफुटीसारखे गंभीर प्रकार रोखण्यात अपयशी ठरलेल्या शिक्षणमंत्र्यांनी नैतिक जबाबदारी स्वीकारून तात्काळ राजीनामा द्यावा. विद्यार्थ्यांच्या भविष्याशी तडजोड करणाऱ्यांविरोधातील लढा अधिक तीव्र केला जाईल,” असे मत व्यक्त केले.
आंदोलनानंतर तहसीलदारांमार्फत शासनाला विविध मागण्यांचे निवेदन देण्यात आले. या निदर्शनात विविध सामाजिक संघटनांचे पदाधिकारी, राजकीय पक्षांचे कार्यकर्ते, विद्यार्थी आणि नागरिक मोठ्या संख्येने सहभागी झाले होते.
