श्रीरामपूर | प्रतिनिधी
श्रीरामपूर तालुक्यातील वडाळा महादेव येथील अजितदादा पवार पॉलिटेक्निक कॉलेजमध्ये अज्ञात चोरट्यांनी कार्यालयाचे कुलूप तोडून सुमारे ६ लाख रुपयांची रोकड आणि दोन डीव्हीआर चोरून नेल्याची घटना शनिवारी (दि. १८) उघडकीस आली. या धाडसी चोरीमुळे परिसरात खळबळ उडाली आहे.
या प्रकरणी श्रीरामपूर शहर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला असून, पोलीस पुढील तपास करत आहेत.
मिळालेल्या माहितीनुसार, महाविद्यालयातील विद्यार्थ्यांकडून जमा झालेले शुल्काचे सुमारे ६ लाख रुपये कार्यालयातील कपाटात ठेवण्यात आले होते. शुक्रवारी संध्याकाळी कार्यालय बंद करताना कपाट आणि कार्यालयाला कुलूप लावण्यात आले होते. मात्र, मध्यरात्रीच्या सुमारास चोरट्यांनी कार्यालयाचे कुलूप तोडून कपाटातील रोकड लंपास केली.
शनिवारी सकाळी महाविद्यालयातील एका अधिकाऱ्याला कार्यालयाच्या दरवाज्याची कडी-कोयंडा तुटलेला दिसला. त्यांनी तात्काळ प्राचार्यांना घटनेची माहिती दिली. त्यानंतर पाहणी केली असता, सुमारे १० हजार रुपये किमतीचे दोन डीव्हीआर देखील चोरीला गेल्याचे निदर्शनास आले.
रोकडीसह डीव्हीआर चोरीला गेल्याने चोरट्यांनी सीसीटीव्हीमधील पुरावे नष्ट करण्याच्या उद्देशाने ते नेले असावेत, असा प्राथमिक अंदाज व्यक्त केला जात असला तरी याबाबत अधिकृत माहिती अद्याप समोर आलेली नाही.
दरम्यान, जिल्हा प्रमुख मुमक्का सुदर्शन यांनी सोमवारी श्रीरामपूर शहर पोलीस ठाण्याला भेट देऊन चोरीच्या घटनेची माहिती घेतली. पोलीस घटनास्थळावरील पुरावे तपासून अज्ञात चोरट्यांचा शोध घेत आहेत.
