सातारा | प्रतिनिधी
उप प्रादेशिक परिवहन कार्यालय, फलटण यांच्या कार्यक्षेत्रातील सर्व वाहनधारकांनी आपल्या जुन्या वाहनांवर उच्च सुरक्षा नोंदणी क्रमांक फलक (High Security Registration Plate – HSRP) तातडीने बसवून घ्यावेत, असे आवाहन उप प्रादेशिक परिवहन अधिकारी सचिन विधाते यांनी केले आहे.
केंद्र शासन व महाराष्ट्र शासनाच्या निर्देशानुसार सर्व जुन्या वाहनांना एचएसआरपी क्रमांक फलक बसविणे बंधनकारक करण्यात आले आहे. ज्या वाहनधारकांनी अद्याप त्यांच्या वाहनांवर एचएसआरपी बसविलेला नाही, त्यांनी अधिकृत केंद्रामार्फत ही प्रक्रिया पूर्ण करावी, असे आवाहन करण्यात आले आहे.
तसेच, ज्या वाहनधारकांनी एचएसआरपी नंबर प्लेटसाठी शुल्क भरले आहे, त्यांच्यावर प्रत्यक्ष नंबर प्लेट बसविली जाईपर्यंत कोणतीही दंडात्मक कारवाई केली जाणार नाही. वाहन तपासणीदरम्यान एचएसआरपीसाठी शुल्क भरल्याची पावती दाखविल्यास कारवाई टाळता येणार असल्याचेही स्पष्ट करण्यात आले आहे.
वाहनधारकांनी कोणतीही गैरसोय अथवा दंडात्मक कारवाई टाळण्यासाठी शक्य तितक्या लवकर आपल्या वाहनांवर उच्च सुरक्षा नोंदणी क्रमांक फलक बसवून घ्यावेत, असे आवाहन उप प्रादेशिक परिवहन कार्यालय, फलटण यांच्या वतीने करण्यात आले आहे.
