पालघर | प्रतिनिधी :
बँक ऑफ बडोदाच्या 119 व्या वर्धापन दिनानिमित्त आसे शाखेतर्फे मोखाडा तालुक्यातील जिल्हा परिषद प्राथमिक शाळा, राऊतपाडा येथे विद्यार्थ्यांना शालेय उपयोगी साहित्याचे वाटप करण्यात आले. या उपक्रमामुळे विद्यार्थ्यांमध्ये आनंदाचे वातावरण निर्माण झाले.
यावेळी विद्यार्थ्यांना वह्या, पेन, पेन्सिल, खोडरबर तसेच इतर शालेय साहित्याचे वितरण करण्यात आले. शिक्षणाला प्रोत्साहन देण्याच्या उद्देशाने बँकेने राबविलेल्या या सामाजिक उपक्रमाचे उपस्थितांनी कौतुक केले.
कार्यक्रमास हिरामण बाबा कोरडे, सामाजिक कार्यकर्ते ईश्वर बांबरे, बँक ऑफ बडोदा आसे शाखेचे व्यवस्थापक शुभम कोवे, बँक कर्मचारी विवेक साळुंखे, संतोष आगलावे, रमेश कोरडे, शाळेचे शिक्षक राऊत तसेच विद्यार्थी मोठ्या संख्येने उपस्थित होते.
यावेळी मान्यवरांनी विद्यार्थ्यांना नियमित शिक्षण, शिस्त आणि गुणवत्तापूर्ण शिक्षणाचे महत्त्व पटवून देत मन लावून अभ्यास करण्याचे आवाहन केले. कार्यक्रमाच्या यशस्वी आयोजनाबद्दल शाळेच्या शिक्षकांनी आणि ग्रामस्थांनी बँक ऑफ बडोदा आसे शाखेचे आभार मानले.
