जत | प्रतिनिधी
राज्याचे उपमुख्यमंत्री एकनाथ शिंदे यांचे निकटवर्तीय, शिवसेना जत उपतालुका प्रमुख तथा युवा सामाजिक कार्यकर्ते चंद्रकांत शिवाजी शिंदे यांचा वाढदिवस दि. 18 जुलै रोजी विविध समाजोपयोगी उपक्रमांनी साजरा करण्यात आला. रक्तदान, मोफत नेत्रतपासणी, शालेय साहित्य वाटप आणि ज्येष्ठ नागरिकांसाठी NCMC कार्ड नोंदणी अशा उपक्रमांमुळे त्यांच्या कार्याची जत तालुक्यात व्यापक चर्चा होत आहे.
वाढदिवसानिमित्त जिल्हा परिषद शाळेतील विद्यार्थ्यांना शालेय साहित्याचे वाटप करण्यात आले. त्यानंतर ओम साई प्रतिष्ठान, शेगाव यांच्या संयुक्त विद्यमाने आयोजित रक्तदान शिबिरात 35 रक्तदात्यांनी रक्तदान केले.
याच कार्यक्रमात मोफत नेत्रतपासणी व सवलतीच्या दरात मोतीबिंदू शस्त्रक्रिया नोंदणी शिबिराचे आयोजन करण्यात आले. या शिबिराचा 75 नागरिकांनी लाभ घेतला. तसेच महिला आणि ज्येष्ठ नागरिकांसाठी NCMC बस सवलत कार्ड नोंदणी व वितरणाची सुविधाही उपलब्ध करून देण्यात आली.
कार्यक्रमास शिवसेना सांगली जिल्हाप्रमुख संजय बापू विभुते, जत तालुका अध्यक्ष अंकुश हुवाळे, जिल्हा परिषद सदस्य डॉ. शिवाजी खिलारे, माजी सरपंच धोंडीराम माने, बबन बुरुटे, महादेव साळुंखे, शिवसेना वैद्यकीय आघाडीचे तालुका प्रमुख दिपक बुरुटे, युवासेना तालुका प्रमुख विवेक चव्हाण यांच्यासह शिवसेनेचे पदाधिकारी, कार्यकर्ते व नागरिक मोठ्या संख्येने उपस्थित होते.
यावेळी डॉ. शिवाजी खिलारे यांनी रक्तदानासारख्या उपक्रमातून समाजसेवेचा संदेश दिल्याबद्दल चंद्रकांत शिंदे यांचे कौतुक केले. जिल्हाप्रमुख संजय बापू विभुते यांनी त्यांच्या संघटन कौशल्याचा गौरव करत, शिवसेनेची ताकद गावागावात पोहोचविण्यात त्यांनी महत्त्वाची भूमिका बजावल्याचे सांगितले. तालुका अध्यक्ष अंकुश हुवाळे यांनीही त्यांच्या समाजाभिमुख कार्याचे कौतुक केले.
कार्यक्रमाचे आयोजन ओम साई प्रतिष्ठान, शेगावचे संस्थापक समाधान माने, अध्यक्ष मारुती (बबलू) शिंदे व सहकाऱ्यांनी केले. कार्यक्रमाच्या यशस्वी आयोजनाबद्दल चंद्रकांत शिंदे यांनी सर्व आयोजक, रक्तदाते, मान्यवर आणि नागरिकांचे आभार मानले.
समाजोपयोगी उपक्रमांद्वारे वाढदिवस साजरा करून “वाढदिवस म्हणजे समाजासाठी काहीतरी देण्याची संधी” हा संदेश चंद्रकांत शिंदे यांनी कृतीतून दिला असून, त्यांच्या या उपक्रमाचे जत तालुक्यासह परिसरात सर्व स्तरांतून कौतुक होत आहे.
