सारथी महाराष्ट्राचा न्यूज | दोंडाईचा | प्रतिनिधी
दोंडाईचा, दि. २१ : मा. पणन व राजशिष्टाचार मंत्री जयकुमारभाऊ रावल यांच्या मार्गदर्शन व सूचनेनुसार दोंडाईचा शहर भाजप परिवाराच्या वतीने श्रीराम मंदिर येथून भगवान श्री जगन्नाथ महाप्रभूंच्या भव्य रथयात्रेचे आयोजन करण्यात आले.
दुपारी ४ वाजता भगवान श्री जगन्नाथ, बलभद्र आणि माता सुभद्रा यांच्या विधिवत पूजन व आरतीनंतर जयघोषाच्या वातावरणात रथयात्रेला प्रारंभ झाला. यावेळी भाजपचे जिल्हा उपाध्यक्ष, शहराध्यक्ष, सभापती, पदाधिकारी, कार्यकर्ते, नगरसेवक, माता-भगिनी तसेच असंख्य भाविक मोठ्या भक्तिभावाने रथयात्रेत सहभागी झाले.
यावर्षी प्रथमच दोंडाईचा शहरातून भगवान श्री जगन्नाथ महाप्रभूंची भव्य रथयात्रा काढण्यात आल्याने हा संपूर्ण शहरासाठी ऐतिहासिक आणि अभिमानाचा क्षण ठरला. रथयात्रेदरम्यान भाविकांनी भगवान श्री जगन्नाथ, बलभद्र आणि माता सुभद्रा यांचे दर्शन घेत आशीर्वाद प्राप्त केला.
रथयात्रेच्या भव्य शोभायात्रेदरम्यान दोंडाईचा सेंट्रल बँकेजवळ जय बालाजी ज्वेलर्स यांच्या वतीने सर्व भाविकांसाठी महाप्रसादाचे वितरण करण्यात आले. महाप्रसादामध्ये मसाला भात, थंड पेय (कोल्ड्रिंक) आणि बिस्किटांचे वाटप करण्यात आले. या प्रसादाचा लाभ मोठ्या संख्येने भाविकांनी घेतला.
भक्तिमय वातावरण, जयघोष आणि उत्स्फूर्त जनसहभागामुळे दोंडाईचा शहरातील ही पहिली भगवान श्री जगन्नाथ रथयात्रा अत्यंत उत्साहात आणि धार्मिक वातावरणात संपन्न झाली.
