कन्नड | प्रतिनिधी
मुख्यमंत्री देवेंद्र फडणवीस यांच्या वाढदिवसानिमित्त कन्नड तालुक्यात भारतीय जनता पक्षाच्या वतीने विविध सामाजिक उपक्रमांचे आयोजन करण्यात आले. भाजप जिल्हाध्यक्ष संजय खंबायते यांच्या नेतृत्वाखाली व मार्गदर्शनाखाली कन्नड, हतनूर, नागद आणि आडगाव येथे रक्तदान शिबिरे, वृक्षारोपण तसेच विविध जनहिताचे उपक्रम उत्साहात पार पडले.
यावेळी बोलताना संजय खंबायते म्हणाले की, “मुख्यमंत्री देवेंद्र फडणवीस यांनी राज्यात पायाभूत सुविधा, जलसंधारण, उद्योग, शेती, शिक्षण, आरोग्य आणि डिजिटल प्रशासन अशा विविध क्षेत्रांत प्रभावी निर्णय घेत महाराष्ट्राच्या विकासाला गती दिली आहे. जनहिताला सर्वोच्च प्राधान्य देत त्यांनी राज्याच्या सर्वांगीण प्रगतीचा भक्कम पाया रचला आहे.”
वाढदिवसानिमित्त आयोजित रक्तदान शिबिरांना युवक आणि नागरिकांनी उत्स्फूर्त प्रतिसाद देत मोठ्या संख्येने रक्तदान केले. या शिबिरांमधून लक्षणीय प्रमाणात रक्तसंकलन करण्यात आले.
यासोबतच पर्यावरण संवर्धनाचा संदेश देण्यासाठी विविध ठिकाणी वृक्षारोपण करण्यात आले. सामाजिक बांधिलकी जपत वाढदिवस सेवा कार्यातून साजरा करण्याचा संकल्प भाजप कार्यकर्त्यांनी व्यक्त केला.
या उपक्रमांच्या यशस्वी आयोजनासाठी भाजप तालुकाध्यक्ष किशोर आबा पवार, जिल्हा सरचिटणीस अनिल चव्हाण, जिल्हा परिषद सदस्या मंजुषा मडके, डॉ. संजय गव्हाणे, मंडळ अध्यक्ष सुनील पवार, पंचायत समिती सदस्य संतोष करवंदे, ललित सुरासे, संघर्ष बोलधने, प्रशांत अग्रवाल यांच्यासह भाजपचे पदाधिकारी, कार्यकर्ते आणि नागरिकांनी विशेष परिश्रम घेतले.
