भडगाव | प्रतिनिधी
पाचोरा वनक्षेत्रातील भडगाव परिमंडळ अंतर्गत नियत क्षेत्र आमडदे येथील मौजे भटगाव शिवारात एका मादी बिबटाचा मृतदेह आढळून आल्याने परिसरात खळबळ उडाली आहे. वन विभागाने घटनास्थळी धाव घेत मृत बिबटाचे शवविच्छेदन करून पुढील तपास सुरू केला आहे.
मिळालेल्या माहितीनुसार, शेतकरी राजेंद्र रामदास पाटील यांच्या शेतालगत असलेल्या बांबरूड–भटगाव रस्त्याच्या कडेला हा मृत बिबट आढळून आला. प्राथमिक माहितीनुसार, हा बिबट मादी असून तिचे वय अंदाजे दोन वर्षे असल्याचे वन विभागाने सांगितले.
घटनेची माहिती मिळताच वन विभागाचे पथक तातडीने घटनास्थळी दाखल झाले. पशुधन विकास अधिकारी, भडगाव यांच्या पथकाने मृत बिबटाचे शवविच्छेदन केले. मात्र, मृत्यूचे नेमके कारण स्पष्ट न झाल्याने व्हिसेरा नमुने तपासणीसाठी प्रयोगशाळेत पाठविण्यात आले आहेत.
ही संपूर्ण कार्यवाही अमोल पाटील (सहाय्यक वनसंरक्षक, जळगाव), राजेश ठोंबरे (मानद वन्यजीव रक्षक, जळगाव) यांच्या उपस्थितीत सरिता पाटील (वनपरिक्षेत्र अधिकारी, पाचोरा) यांच्या मार्गदर्शनाखाली पार पडली.
वन विभागाकडून बिबटाच्या मृत्यूमागील कारणांचा सखोल तपास सुरू असून, प्रयोगशाळेचा अहवाल प्राप्त झाल्यानंतरच मृत्यूचे नेमके कारण स्पष्ट होणार असल्याची माहिती वन विभागाने दिली आहे.
