पूर्णा | प्रतिनिधी
परभणी जिल्ह्यातील पूर्णा तालुक्यातील कावलगाव येथील अंगणवाडी क्रमांक २ मध्ये शुक्रवारी (दि. २४ जुलै २०२६) कवड्या जातीचा साप आढळून आल्याने विद्यार्थी, पालक आणि ग्रामस्थांमध्ये भीतीचे वातावरण निर्माण झाले आहे. अंगणवाडीची इमारत आधीपासूनच अत्यंत जीर्ण व धोकादायक अवस्थेत असल्याने या घटनेने सुरक्षिततेचा प्रश्न पुन्हा ऐरणीवर आला आहे.
ग्रामस्थांच्या म्हणण्यानुसार, अंगणवाडी इमारतीची दुरवस्था लक्षात आणून देण्यासाठी संबंधित प्रशासनाला अनेक वेळा निवेदने देण्यात आली आहेत. मात्र, अद्याप कोणतीही ठोस कार्यवाही करण्यात आलेली नसल्याचा आरोप स्थानिक नागरिकांनी केला आहे.
अंगणवाडीच्या परिसरात साप आढळल्यामुळे पालकांमध्ये मोठी चिंता निर्माण झाली असून, लहान मुलांच्या जीवितास धोका निर्माण होण्याची शक्यता व्यक्त केली जात आहे. त्यामुळे मुलांना अंगणवाडीत पाठविण्याबाबतही पालक साशंक झाले आहेत.
ग्रामस्थांनी प्रशासनाकडे अंगणवाडी इमारतीची तातडीने पाहणी करून आवश्यक दुरुस्ती किंवा नवीन इमारतीची व्यवस्था करण्याची मागणी केली आहे. तसेच परिसरातील झाडाझुडपे साफ करून सर्प व इतर विषारी प्राण्यांचा धोका टाळण्यासाठी त्वरित उपाययोजना कराव्यात, अशी मागणीही करण्यात आली आहे.
या प्रकरणी संबंधित प्रशासनाने तातडीने दखल घेऊन विद्यार्थ्यांच्या सुरक्षिततेच्या दृष्टीने आवश्यक कार्यवाही करावी, अशी अपेक्षा ग्रामस्थ आणि पालकांकडून व्यक्त करण्यात येत आहे.
