शहादा,दि.१३ (प्रतिनिधी)
पूज्य साने गुरुजी विद्या प्रसारक मंडळाचे कला, विज्ञान व वाणिज्य महाविद्यालय, शहादा येथील राष्ट्रीय सेवा योजना विभागाच्या वतीने ‘आंतरराष्ट्रीय युवा दिना’निमित्त ‘नशामुक्त युवा-नशामुक्त भारत’ या विषयावर पोस्टर स्पर्धेचे आयोजन करण्यात आले होते.
या स्पर्धेचे उद्घाटन महाविद्यालयाचे प्राचार्य डॉ. एम. के. पटेल यांच्या हस्ते पार पडले. या प्रसंगी विद्यार्थ्यांना मार्गदर्शन करताना डॉ. पटेल म्हणाले, “अंमली पदार्थांचे सेवन मानवी आरोग्य नष्ट करते, व्यक्तिमत्त्व उद्ध्वस्त करते आणि संपूर्ण समाजाला धोक्यात आणते.”
विद्यार्थ्यांचा कलात्मक व प्रभावी संदेश या स्पर्धेत महाविद्यालयातील विद्यार्थ्यांनी उत्स्फूर्त सहभाग नोंदवला. तंबाखू, गुटखा, मद्य व विविध अंमली पदार्थांचे शारीरिक, मानसिक, सामाजिक आणि आर्थिक दुष्परिणाम विद्यार्थ्यांनी आपल्या कलात्मक पोस्टरच्या माध्यमातून प्रभावीपणे मांडले. ‘नशामुक्त युवा, सक्षम भारत’ आणि ‘व्यसनमुक्त समाज हीच विकासाची दिशा’ अशा विविध आकर्षक घोषवाक्यांनी व चित्रांनी उपस्थितांचे लक्ष वेधून घेतले.
तज्ज्ञ परीक्षकांचे मार्गदर्शन
स्पर्धेचे परीक्षक म्हणून कवयित्री बहिणाबाई चौधरी उत्तर महाराष्ट्र विद्यापीठ, जळगाव विद्यार्थी कल्याण विभागाचे नंदुरबार जिल्हा समन्वयक डॉ. विजयप्रकाश शर्मा, महाविद्यालयाच्या विद्यार्थी कल्याण अधिकारी डॉ. वर्षा चौधरी आणि माजी रासेयो कार्यक्रम अधिकारी डॉ. राजेंद्र पाटील यांनी जबाबदारी सांभाळली.परीक्षकांच्या मार्गदर्शनामुळे विद्यार्थ्यांच्या कलाकृतींना योग्य आणि सकारात्मक दृष्टीकोन मिळाला.
संस्थेच्या पदाधिकाऱ्यांचे प्रोत्साहन
या उपक्रमास पूज्य साने गुरुजी विद्या प्रसारक मंडळाचे अध्यक्ष बापूसाहेब दीपकभाई पाटील, उपाध्यक्ष जगदीश पाटील, समन्वयक प्रा. मकरंद पाटील, संचालक मयूरभाई दीपक पाटील, प्राचार्य डॉ. एम. के. पटेल तसेच उपप्राचार्य डॉ. एस. डी. सिंदखेडकर यांचे मोलाचे मार्गदर्शन लाभले.कार्यक्रम यशस्वी करण्यासाठी रासेयो कार्यक्रम अधिकारी डॉ. वजीह अशहर, डॉ. सतीश भांडे, प्रा. विजया पाटील आणि रासेयो स्वयंसेवकांनी विशेष परिश्रम घेतले.
