“मुख्याध्यापक एस. जी. लाड यांच्या हस्ते ध्वजारोहण; विद्यार्थ्यांची शहरातून प्रभातफेरी”
परभणी/प्रतिनिधी :- रमेश मुलगीर
मानवत येथील नेताजी सुभाष विद्यालयात आज, शनिवार दि. १५ ऑगस्ट २०२६ रोजी देशाचा ८० वा स्वातंत्र्यदिन मोठ्या उत्साहात व देशभक्तीपूर्ण वातावरणात साजरा करण्यात आला. यावेळी विद्यालयाचे मुख्याध्यापक एस. जी. लाड यांच्या हस्ते ध्वजारोहण करण्यात आले. ध्वजारोहणानंतर उपस्थितांनी राष्ट्रध्वजाला मानवंदना देत राष्ट्रगीत गायले.
स्वातंत्र्यदिनाच्या निमित्ताने विद्यालयातील विद्यार्थ्यांनी शहरातून भव्य प्रभातफेरी काढली. विविध देशभक्तीपर घोषणा देत तसेच हातात तिरंगा घेऊन विद्यार्थी प्रभातफेरीत सहभागी झाले. प्रभातफेरीमुळे शहरातील वातावरण देशभक्तीच्या रंगात रंगून गेले.
या कार्यक्रमाला विद्यालयाचे मुख्याध्यापक एस. जी. लाड, माजी मुख्याध्यापक जी एस सिखवाल ,केशव शिंदे, अंबादास बंडे सर, पी.बी. पुरी, पडघम सर, रमेश मुलगीर सर, अलका सुरेकर, कमल पाटील, ओंकार इंगोले सर माजी कर्मचारी तसेच शिक्षक, शिक्षकेतर कर्मचारी आणि विद्यार्थी मोठ्या संख्येने उपस्थित होते. उपस्थित मान्यवरांनी विद्यार्थ्यांना स्वातंत्र्यदिनाचे महत्त्व सांगून देशाच्या स्वातंत्र्यासाठी बलिदान देणाऱ्या स्वातंत्र्यसैनिकांच्या त्यागाची आठवण करून दिली.
विद्यार्थ्यांनी स्वातंत्र्यदिनानिमित्त आयोजित विविध उपक्रमांमध्ये उत्स्फूर्त सहभाग घेतला. शिस्तबद्ध पद्धतीने काढण्यात आलेल्या प्रभातफेरीने नागरिकांचे लक्ष वेधून घेतले. विविध वेशभूषा करून विद्यार्थी प्रभात फेरीत सामील झाले होते.कार्यक्रमाचा उत्साहपूर्ण वातावरणात समारोप करण्यात आला.
