“शासकीय नेत्र रुग्णालय व कस्तुरबा गांधी बालिका विद्यालयातील प्रकरणांच्या चौकशीची मागणी; आंदोलन तीव्र करण्याचा इशारा”
परभणी/प्रतिनिधी :- रमेश मुलगीर
परभणी स्वातंत्र्य दिनानिमित्त शनिवार, दि. १५ ऑगस्ट रोजी परभणी जिल्हाधिकारी कार्यालयाच्या आवारात ध्वजारोहण कार्यक्रमासाठी पालकमंत्री तथा आरोग्यमंत्री मेघना बोर्डीकर उपस्थित असताना रिपब्लिकन सेनेच्या पदाधिकाऱ्यांनी काळे झेंडे दाखवत निषेध व्यक्त केला. अचानक झालेल्या या आंदोलनामुळे जिल्हाधिकारी कार्यालय परिसरात काही काळ तणावाचे वातावरण निर्माण झाले.
रिपब्लिकन सेनेच्या पदाधिकाऱ्यांकडून शासकीय नेत्र रुग्णालयातील प्रकरणाची निष्पक्ष चौकशी करण्याची मागणी करण्यात येत आहे. तसेच गंगाखेड येथील कस्तुरबा गांधी बालिका विद्यालयातील कथित प्रकरणाची सखोल चौकशी करून दोषी आढळणाऱ्यांवर कठोर कारवाई करावी, अशीही मागणी आंदोलनकर्त्यांनी केली आहे.
दरम्यान, या मागण्यांसाठी उपोषण करणारे वामनराव राठोड यांची प्रकृती खालावल्याने त्यांना उपचारासाठी शासकीय रुग्णालयात दाखल करण्यात आल्याचे सांगण्यात आले. त्यांच्या प्रकृतीची गंभीर दखल घेऊन प्रशासनाने संबंधित मागण्यांवर तातडीने निर्णय घ्यावा, अशी भूमिका रिपब्लिकन सेनेच्या पदाधिकाऱ्यांनी मांडली.
पालकमंत्री मेघना बोर्डीकर ध्वजारोहण कार्यक्रमासाठी जिल्हाधिकारी कार्यालयात दाखल झाल्यानंतर रिपब्लिकन सेनेच्या पदाधिकाऱ्यांनी काळे झेंडे दाखवत घोषणाबाजी करून निषेध नोंदविला. परिस्थिती नियंत्रणात ठेवण्यासाठी पोलिसांनी तत्काळ हस्तक्षेप करत आंदोलनकर्त्या पदाधिकाऱ्यांना ताब्यात घेतले.
रिपब्लिकन सेनेने आपल्या विविध मागण्यांबाबत प्रशासनाने तातडीने सकारात्मक निर्णय घ्यावा, अशी मागणी केली आहे. मागण्यांकडे दुर्लक्ष झाल्यास आगामी काळात आंदोलन अधिक तीव्र करण्यात येईल, असा इशाराही संघटनेच्या वतीने देण्यात आला आहे.
स्वातंत्र्य दिनाच्या शासकीय कार्यक्रमादरम्यान झालेल्या या निषेध आंदोलनामुळे प्रशासनासमोरही मोठे आव्हान निर्माण झाले आहे. आता रिपब्लिकन सेनेच्या मागण्यांवर जिल्हा प्रशासन व संबंधित विभाग कोणती भूमिका घेतात आणि चौकशीबाबत पुढील निर्णय काय होतो, याकडे परभणीकरांचे लक्ष लागले आहे.
