शहादा,दि.१६
भारताच्या ८० व्या स्वातंत्र्यदिनानिमित्त शहादा येथील पूज्य साने गुरुजी विद्या प्रसारक मंडळाच्या विविध ज्ञानशाखांचा संयुक्त मुख्य ध्वजारोहण सोहळा अत्यंत उत्साही आणि देशभक्तीपूर्ण वातावरणात पार पडला.
मंडळाचे अध्यक्ष बापूसाहेब दीपकभाई पाटील यांच्या हस्ते औषध निर्माण शास्त्र महाविद्यालयाच्या पटांगणावर ध्वजारोहण करण्यात आले. या मुख्य कार्यक्रमास परिसरातील नागरिक, शिक्षक, शिक्षकेतर कर्मचारी व विद्यार्थ्यांची मोठी उपस्थिती लाभली होती.ध्वजारोहणाच्या मुख्य सोहळ्यानंतर काॅलेज ते लोणखेडा गावातील परिसराचे भाग्यविधाते कै. अण्णासाहेब पी. के. पाटील यांच्या स्मारक स्थळापर्यंत भव्य ‘तिरंगा रॅली’ काढण्यात आली. हातात राष्ट्रध्वज घेऊन आणि देशभक्तीपर घोषणा देत निघालेल्या या रॅलीने संपूर्ण परिसर देशभक्तीच्या रंगात रंगवून टाकला होता.या तिरंगा रॅलीमध्ये शहादा-तळोदा मतदारसंघाचे आमदार राजेश पाडवी, पूज्य साने गुरुजी विद्या प्रसारक मंडळाचे अध्यक्ष बापूसाहेब दीपकभाई पाटील, उपाध्यक्ष जगदीश पाटील, शहादा नगरपालिकेच्या उपनगराध्यक्ष सौ. माधवी मकरंद पाटील,
भाजपचे शहराध्यक्ष ज्ञानेश्वर चौधरी, तसेच कृषी उत्पन्न बाजार समितीचे माजी उपसभापती सुनील पाटील यांच्यासह शहादा नगरपालिकेतील भारतीय जनता पक्षाचे लोकप्रतिनिधी, विविध सामाजिक व सहकारी संस्थांचे पदाधिकारी आणि नागरिक मोठ्या संख्येने सहभागी झाले होते.हा संपूर्ण उपक्रम यशस्वी करण्यासाठी मंडळाचे समन्वयक प्रा. मकरंद पाटील यांच्या मार्गदर्शनाखाली प्राचार्य डॉ. एम. के. पटेल, प्राचार्य डॉ. एस. पी. पवार, प्राचार्य डॉ. एन. जे. पाटील, प्राचार्य डॉ. पी. एल. पटेल, प्राचार्य आर. एस. पाटील, प्राचार्या कीर्ती महाडिक, प्राचार्य बी. के. सोनी यांच्यासह एन.एस.एस. (राष्ट्रीय सेवा योजना) आणि एन.सी.सी. च्या पथकांनी विशेष परिश्रम घेऊन उत्कृष्ट नियोजन केले.
