शहादा,दि.१७(का.प्र.)
पूज्य सानेगुरुजी विद्या प्रसारक मंडळाच्या कला, विज्ञान व वाणिज्य महाविद्यालय, शहादा येथे “उन्मेष” भित्तीपत्रकाचे उद्घाटन उत्साहात संपन्न झाले. विद्यार्थ्यांच्या साहित्यिक, कलात्मक व सर्जनशील गुणांना योग्य व्यासपीठ उपलब्ध करून देण्याच्या उद्देशाने या भित्तीपत्रिकेचे आयोजन करण्यात आले आहे.
उद्घाटन प्रसंगी विद्यार्थ्यांनी “स्वातंत्र्य सेनानी” या विषयावर आधारित विविध चित्रांचे आकर्षक प्रदर्शन भरवले होते.या भित्तीपत्रिकेचे उद्घाटन आमदार राजेश पाडवी, संस्थेचे अध्यक्ष दीपकभाई पाटील आणि शहादा नगरपालिकेच्या उपाध्यक्ष सौ. माधवीताई मकरंद पाटील यांच्या शुभहस्ते करण्यात आले.आपल्या मार्गदर्शनपर भाषणात संस्थेचे अध्यक्ष दीपकभाई पाटील म्हणाले, “भित्तीपत्रिका हे विद्यार्थ्यांची सृजनशीलता, विचारप्रवृत्ती व सामाजिक भान जागवणारे एक प्रभावी माध्यम आहे. विद्यार्थ्यांनी लेखन, कविता आणि चित्रकला यांसारख्या माध्यमातून आपली दृष्टी व चिंतन समाजासमोर मांडले पाहिजे.
“”उन्मेष” या भित्तीपत्रिकेच्या यशस्वी संपादनासाठी संपादक मंडळाचे प्रमुख डॉ. सतीश भांडे, सचिव डॉ. वजीह अशहर, सदस्य प्रा. एस. एल. भालेराव, डॉ. ए. आर. कांबळे, प्रा. विजया पाटील, ग्रंथालय विभागातील श्री. आर. एस. शेख आणि विद्यार्थ्यांनी विशेष परिश्रम घेतले.या कार्यक्रमास पूज्य सानेगुरुजी विद्या प्रसारक मंडळाचे उपाध्यक्ष जगदीश पाटील, शैक्षणिक समन्वयक प्रा. मकरंद पाटील, शहादा नगरपालिकेचे सर्व नगरसेवक व नगरसेविका, विद्याश्रम परिवारातील सर्व प्राचार्य, महाविद्यालयाचे प्राचार्य प्रा. डॉ. एम. के. पटेल तसेच उपप्राचार्य डॉ. एस. डी. सिंदखेडकर यांची प्रमुख उपस्थिती होती. कार्यक्रम यशस्वीरीत्या पार पडल्याबद्दल सर्व स्तरातून विद्यार्थ्यांचे व संपादक मंडळाचे कौतुक केले जात आहे.
