सुरेल तालावर जिद्दीची मात!
अमळनेर(प्रतिनिधी):स्वातंत्र्यदिनाचे औचित्य साधून अंधजन कल्याण मंडळातर्फे आयोजित करण्यात आलेली भव्य चॅरिटी संगीत मैफिल रसिकांच्या उत्स्फूर्त प्रतिसादात आणि भावपूर्ण वातावरणात संपन्न झाली. येथील स्टेशन रोडवरील छत्रपती शिवाजी नाट्यगृहात शनिवारी (१५ ऑगस्ट) पार पडलेल्या या कार्यक्रमाने उपस्थितांना तब्बल साडेचार तास मंत्रमुग्ध करून ठेवले. दृष्टिदिव्यांग कलाकारांनी आपल्या सुरेल सादरीकरणाने उपस्थितांची मने जिंकत कार्यक्रमाला ‘सुपरहिट’ ठरवले.
* शासकीय सेवेतील कलाकारांचा संगीतमय आविष्कार*
या कार्यक्रमाचे मुख्य आकर्षण म्हणजे सादरीकरण करणारे सर्व कलाकार हे दृष्टिदिव्यांग असून शासकीय सेवेत कार्यरत आहेत. ‘सप्तस्वरांजली म्युझिकल ग्रुप’च्या या कलाकारांनी देशभक्तीपर, मराठी, हिंदी तसेच अहिराणी भाषेतील सदाबहार गीतांची बहारदार मैफल सजवली. एकापेक्षा एक सरस गीतांच्या सादरीकरणावर प्रेक्षकांनी टाळ्यांच्या कडकडाटात कलाकारांना भरभरून दाद दिली. कलाकारांच्या आत्मविश्वासाने भरलेल्या सादरीकरणामुळे अनेक उपस्थितांच्या डोळ्यांत आनंदाश्रू तरळले. प्रत्येक गाण्यानंतर मान्यवरांकडून कलाकारांना प्रोत्साहनपर पारितोषिके देऊन गौरवण्यात आले.
* सामाजिक बांधिलकी अन् शिष्यवृत्ती वाटप*
कार्यक्रमाची सुरुवात मान्यवरांच्या हस्ते दीपप्रज्वलनाने झाली. या प्रसंगी अनेक दृष्टिदिव्यांग बांधव व भगिनी मोठ्या संख्येने उपस्थित होत्या. या सोहळ्यात गरजू दृष्टिहीन विद्यार्थ्यांना शिष्यवृत्तीचे वाटप करण्यात आले, ज्यामुळे कार्यक्रमाला सामाजिक बांधिलकीची एक अर्थपूर्ण जोड मिळाली.
अंध कलाकारांच्या कला, कौशल्य, जिद्द आणि स्वावलंबनाला प्रोत्साहन देणे हा या उपक्रमाचा मुख्य उद्देश होता.
* विविध संस्थांचे भरीव सहकार्य*
या चॅरिटी शोमधून प्राप्त होणारा निधी दृष्टिदिव्यांग बांधवांच्या शिक्षण, आरोग्य, स्वयंरोजगार, कौशल्य विकास आणि विविध सामाजिक कल्याणकारी उपक्रमांसाठी वापरण्यात येणार असल्याचे आयोजकांनी सांगितले.
या सामाजिक उपक्रमाला खालील संस्था व मान्यवरांचे भरीव आर्थिक सहकार्य लाभले:
अमळनेर नगरपरिषद
जयनिल फाऊंडेशन
श्री मंगळग्रह सेवा संस्था
छत्रपती शिवाजी महाराज गार्डन ग्रुप,कुसुमाई बिझिनेस ग्रुप,
जळगाव जनता सहकारी बँक
दृष्टी फाऊंडेशन (पुणे)
मोहिनी ब्रास बँड
जिनवश्री रक्तपेढी (अमळनेर)
लायन्स क्लब अमळनेर
अमळनेर शहर व तालुका पत्रकार संघ यांसह विविध उद्योजक, व्यापारी आणि मान्यवरांचे सहकार्य लाभले.
