कडेगाव : चिंचणी गावच्या हद्दीतील मुख्य रस्त्याच्या दुरुस्तीसाठी सुरू असलेल्या उपोषणाला अखेर यश आले आहे. सार्वजनिक बांधकाम मंत्री शिवेंद्रसिंहराजे भोसले यांच्याशी मा. आ. पृथ्वीराज बाबा देशमुख यांनी चर्चा केली. या चर्चेत चिंचणी गावच्या हद्दीतील अंदाजे ५ किलोमीटर मुख्य रस्त्यासाठी येणाऱ्या बजेटमध्ये तरतूद करण्याचे आश्वासन देण्यात आले.
या आश्वासनानंतर उपस्थित ग्रामस्थांशी चर्चा करण्यात आली. ग्रामस्थांच्या संमतीने उपोषण थांबविण्यात आले.
या आंदोलनात गावातील सामाजिक कार्यकर्ते व युवा सहकारी उपोषणकर्ते श्री. अविनाश माने व श्री. कुलदीप औताडे यांनी धाडसी भूमिका घेत उपोषण केले. त्यांच्या या धाडसी साहसामुळे चिंचणी गावच्या रस्त्याचा प्रश्न ऐरणीवर आला आणि शासनस्तरावर या प्रश्नाला वाचा फुटली.
या सामाजिक कार्यात गावातील नागरिकांनीही गट-तट बाजूला ठेवून एकजूट दाखवत ठोस पाठिंबा दिला. ग्रामस्थांच्या या एकजुटीमुळेच आंदोलनाला व्यापक प्रतिसाद मिळाला.
