रत्नागिरी : रत्नागिरी शहर पोलीस ठाण्याच्या हद्दीत एका दुकानात झालेल्या चोरीच्या गुन्ह्याचा पोलिसांनी छडा लावत आरोपीला मुद्देमालासह ताब्यात घेतले आहे. या कारवाईत लॅपटॉप, सिलिंग फॅन, स्पीकर आदी एकूण ₹२ लाख १३ हजार किमतीचा मुद्देमाल हस्तगत करण्यात पोलिसांना यश आले.
सदर चोरीच्या घटनेचे गांभीर्य लक्षात घेऊन मा. पोलीस अधीक्षक श्री. नितीन बगाटे (भा.पो.से.) तसेच मा. अपर पोलीस अधीक्षक श्री. बी. बी. महामुनी यांनी आरोपीचा शोध घेऊन चोरीस गेलेला मुद्देमाल हस्तगत करण्याच्या सूचना दिल्या होत्या.
त्यानुसार, परि. पोलीस उपअधीक्षक श्री. अभिजीत थोरात यांच्या नेतृत्वाखाली रत्नागिरी शहर पोलीस ठाण्याच्या गुन्हे प्रकटीकरण पथकाने तपासाला वेग दिला. गोपनीय माहिती तसेच तांत्रिक तपासाच्या आधारे पोलिसांनी तपासाची चक्रे फिरवत चोरीच्या घटनेचा उलगडा केला.
तपासादरम्यान सदर दुकानातीलच कामगाराने फसवणूक करून चोरी केल्याचे निष्पन्न झाले. पोलिसांनी आरोपीसह चोरीस गेलेला लॅपटॉप, सिलिंग फॅन, स्पीकर आदी ₹२,१३,०००/- किमतीचा मुद्देमाल हस्तगत केला.
या कारवाईमुळे चोरीच्या गुन्ह्याचा जलदगतीने तपास करत पोलिसांनी चोरीस गेलेल्या मालाची प्रभावीपणे वसुली केल्याचे दिसून आले आहे. पुढील तपास रत्नागिरी शहर पोलीस ठाण्याकडून सुरू आहे.
