कडेगाव : महिला व बालविकास विभागाच्या वतीने राबविण्यात आलेल्या आदिशक्ती अभियानात अंबक ग्रामपंचायतीने उल्लेखनीय कामगिरी करत सांगली जिल्ह्यात तृतीय तर कडेगाव तालुक्यात प्रथम क्रमांक पटकावला.
स्वातंत्र्यदिनानिमित्त सांगली येथील जिल्हाधिकारी कार्यालयात आयोजित कार्यक्रमात राज्याचे उच्च व तंत्र शिक्षण मंत्री तथा सांगली जिल्ह्याचे पालकमंत्री मा. चंद्रकांत पाटील यांच्या हस्ते अंबक ग्रामपंचायतीच्या पदाधिकाऱ्यांना सन्मानपत्र व पुरस्कार देऊन गौरविण्यात आले.
पुरस्कार स्वीकारणाऱ्या टीममध्ये दीपलक्ष्मी परनाकर, बाल विकास प्रकल्प अधिकारी, सरपंच सुरेश तांबेवाघ, उपसरपंच रोहित जगदाळे, ग्रामपंचायत अधिकारी प्रशांत कोळी, आदिशक्ती समिती अध्यक्षा शुभांगी जगदाळे, सदस्य जयदीप पाटील व गणेश सुतार, आशा सेविका जयश्री जगदाळे, अंगणवाडी सेविका शहाणी तांबेवाघ आणि संगणक परिचालक अक्षय सुतार यांचा समावेश होता.
अंबक ग्रामपंचायतीच्या या दुहेरी यशाबद्दल ग्रामस्थांमधून अभिनंदनाचा वर्षाव होत असून, या कामगिरीमुळे गावाच्या शिरपेचात मानाचा तुरा रोवला आहे.
