चांदूर रेल्वेत सामाजिक व शैक्षणिक उपक्रमांना उत्स्फूर्त प्रतिसाद
चांदूर रेल्वे, दि. ११ ऑगस्ट २०२६ :
आपले सर्वांचे लाडके नेतृत्व मा. आ. प्रा. वीरेंद्रभाऊ जगताप यांच्या वाढदिवसानिमित्त तसेच नगरसेविका ॲड. कीर्तीताई राहुल इमले आणि नगरसेवक तथा गटनेता मो. अनिस सौदागर यांच्या वाढदिवसानिमित्त चांदूर रेल्वे शहरात विविध सामाजिक व शैक्षणिक उपक्रमांचे आयोजन करण्यात आले. या उपक्रमांना नागरिक, विद्यार्थी, पालक व शिक्षकांचा उत्स्फूर्त प्रतिसाद मिळाला.
उपक्रमाची सुरुवात ग्रामीण रुग्णालय, चांदूर रेल्वे येथे रुग्णांना फळवाटप करून करण्यात आली. त्यानंतर यशवंत लॉन्स, चांदूर रेल्वे येथे महाराष्ट्र राज्य परीक्षा परिषद, पुणे यांच्या शिष्यवृत्ती परीक्षेत यश संपादन केलेल्या ११० गुणवंत विद्यार्थ्यांचा सत्कार सोहळा उत्साहात पार पडला.
यावेळी विद्यार्थ्यांसोबतच त्यांच्या शैक्षणिक यशामागे मोलाचे योगदान देणाऱ्या शिक्षकांचाही गौरव करण्यात आला. गुणवंत विद्यार्थ्यांच्या पाठीवर कौतुकाची थाप देत त्यांना भविष्यातील शैक्षणिक वाटचालीसाठी शुभेच्छा देण्यात आल्या. तसेच न. प. हुतात्मा स्मारक अभ्यासिका येथील विद्यार्थ्यांसाठी पुस्तक भेट वितरणाचा उपक्रम राबविण्यात आला.
कार्यक्रमात महाराष्ट्र प्रदेश युवक काँग्रेसचे महासचिव परीक्षित जगताप यांनी विद्यार्थ्यांना मार्गदर्शन केले. तसेच प्रा. प्रभाकरराव वाघ सर आणि हर्षल वाघ प्रास्ताविक सतपाल वरठे यांनी विद्यार्थ्यांना मार्गदर्शन करत शिक्षण, मेहनत, सातत्य आणि जिद्द यांचे महत्त्व पटवून दिले.
कार्यक्रमाच्या व्यासपीठावर बाजार समितीचे सभापती राजेंद्रजी राजनेकर, खरेदी-विक्री संघाचे अध्यक्ष दिनेश जी ठाकरे, माजी सभापती गणेश जी आरेकर, अमोल भाऊ होले, शिट्टु दादा सूर्यवंशी, ॲड. कीर्तीताई इमले, अरिहंत गेडाम, निलोफर शेख, माजी नगराध्यक्ष अंजलीताई अग्रवाल, प्रियांकाताई वरठे, पूनमताई कोकाटे, कल्पनाताई लांजेवार तसेच यांच्यासह विविध क्षेत्रातील मान्यवर उपस्थित होते. कार्यक्रमाचे सूत्रसंचालन अभिजीत देशमुख यांनी केले.
यावेळी उपस्थित मान्यवरांनी विद्यार्थ्यांचे अभिनंदन करत त्यांच्या उज्ज्वल भविष्यासाठी शुभेच्छा दिल्या. शिक्षणाच्या माध्यमातून शहरातील युवा पिढी सक्षम व्हावी, गुणवंत विद्यार्थ्यांना प्रोत्साहन मिळावे आणि त्यांच्यामध्ये स्पर्धात्मक परीक्षांची सकारात्मक भावना निर्माण व्हावी, या उद्देशाने अशा उपक्रमांची गरज असल्याचे मान्यवरांनी सांगितले.
वाढदिवसाचा उत्सव केवळ औपचारिक पद्धतीने न साजरा करता रुग्णसेवा, गुणवंत विद्यार्थ्यांचा सत्कार, शिक्षकांचा गौरव आणि विद्यार्थ्यांना पुस्तक भेट अशा सामाजिक व शैक्षणिक उपक्रमांच्या माध्यमातून साजरा करण्यात आला. या उपक्रमातून सामाजिक बांधिलकी आणि शैक्षणिक क्षेत्राप्रती असलेली सकारात्मक भूमिका अधोरेखित झाली.
मा. आ. वीरेंद्रभाऊ जगताप मित्र परिवार, चांदूर रेल्वे यांच्या वतीने आयोजित या कार्यक्रमाचे उपस्थित मान्यवर, विद्यार्थी, पालक, शिक्षक व नागरिकांनी कौतुक केले.
