चांदूर रेल्वे, जि. अमरावती : राजर्षी शाहू सायन्स कॉलेज, चांदूर रेल्वे येथे ८० वा स्वातंत्र्य दिन उत्साहपूर्ण वातावरणात साजरा करण्यात आला. कार्यक्रमाच्या निमित्ताने विविध उपक्रमांचे आयोजन करण्यात आले. यावेळी महाविद्यालयाच्या एनसीसी युनिटने शिस्तबद्ध व आकर्षक संचलन सादर करून उपस्थितांची मने जिंकली.
कार्यक्रमाच्या अध्यक्षस्थानी मा. सौ. प्रा. यू. व्ही. जगताप होत्या. यावेळी महाविद्यालयाचे प्राचार्य डॉ. पी. आर. वडनेरकर, मुख्याध्यापक श्री. प्रदीप तळोकार, श्री. कुणाल सिंगलवार, सौ. वर्षा भगत तसेच सी.टी.ओ./एनसीसी अधिकारी डॉ. एस. एस. पाडेन यांची प्रमुख उपस्थिती होती. कार्यक्रमाचे सूत्रसंचालन श्री. प्रवीण चव्हाण यांनी केले, तर कार्यक्रमाचे समन्वयक म्हणून प्रा. अस्लम एन. खान यांनी जबाबदारी पार पाडली.
स्वातंत्र्य दिनाच्या औचित्याने महाविद्यालयाच्या ‘संकल्प’ या महाविद्यालयीन नियतकालिकाचे विमोचन मान्यवरांच्या हस्ते करण्यात आले. नियतकालिकाच्या संपादक मंडळात डॉ. ए. डी. बानसोड, डॉ. संपदा पी. पाथरकर, श्री. के. के. सोळंके आणि श्री. पी. डब्लू. चव्हाण यांचा समावेश आहे.
स्वातंत्र्य दिनाचे औचित्य साधून महाविद्यालय परिसरात वृक्षारोपण कार्यक्रमही घेण्यात आला. राष्ट्रीय सेवा योजना (NSS) समन्वयक तथा कार्यक्रम अधिकारी डॉ. जी. बी. संतापे आणि डॉ. आर. एन. भगत यांच्या मार्गदर्शनाखाली वृक्षारोपण करण्यात आले. पर्यावरण संवर्धनाचा संदेश देत विद्यार्थ्यांनी या उपक्रमात उत्स्फूर्त सहभाग नोंदविला.
यावेळी महाविद्यालयातील गुणवंत व अव्वल क्रमांक प्राप्त विद्यार्थ्यांचा मान्यवरांच्या हस्ते सत्कार करण्यात आला. विद्यार्थ्यांनी शैक्षणिक क्षेत्रात केलेल्या उल्लेखनीय कामगिरीचे कौतुक करून त्यांना पुढील वाटचालीसाठी शुभेच्छा देण्यात आल्या.
कार्यक्रमाच्या यशस्वी आयोजनासाठी महाविद्यालयातील शिक्षक, शिक्षकेतर कर्मचारी, एनसीसी कॅडेट्स, एनएसएस स्वयंसेवक आणि विद्यार्थ्यांनी सहकार्य केले. देशभक्ती, शिस्त, पर्यावरण संवर्धन आणि विद्यार्थ्यांच्या गुणवत्तेचा गौरव अशा विविध उपक्रमांमुळे स्वातंत्र्य दिनाचा कार्यक्रम उत्साहात संपन्न झाला.
