खटाव : प्रतिनिधी
मशिनरी खरेदीच्या व्यवहारात एका महिलेची तब्बल ६ कोटी ३५ लाख ७ हजार ६०० रुपयांची फसवणूक झाल्याची घटना समोर आली आहे. याप्रकरणी सातारा तालुका पोलीस ठाण्यात तिघांविरुद्ध फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, संबंधित महिलेने कच्चा माल तयार करण्यासाठी एकूण २६ मशिनरी खरेदी करण्याचा व्यवहार केला होता. या व्यवहारासाठी संबंधित कंपनीला आरटीजीएसद्वारे ६ कोटी ३५ लाख ७ हजार ६०० रुपये पाठविण्यात आले होते.
व्यवहारादरम्यान संबंधितांनी महिलेचा विश्वास संपादन करून प्रत्यक्ष दाखविलेल्या मशिनरीच देण्याचे आश्वासन दिल्याचा आरोप आहे. मात्र, पैसे प्राप्त झाल्यानंतर दाखविण्यात आलेल्या मशिनरीऐवजी वेगळ्याच मशिनरी पाठविण्यात आल्याचे तक्रारीत नमूद करण्यात आले आहे.
याबाबत संबंधितांशी वारंवार संपर्क साधूनही समाधानकारक प्रतिसाद मिळाला नसल्याने अखेर महिलेने पोलिसांकडे तक्रार दाखल केली.
या तक्रारीवरून भारतीय न्याय संहितेतील संबंधित कलमांनुसार तिघांविरुद्ध गुन्हा दाखल करण्यात आला असून, या प्रकरणाचा पुढील तपास सातारा तालुका पोलीस करीत आहेत.
