विद्यार्थ्यांच्या शिक्षणावर खर्च करा; अवैध धंद्यांची माहिती तातडीने द्या : पीआय राहुल सूर्यतळ

जिवाजीवाडी व तुकुचीवाडीत गावकऱ्यांशी संवाद; पैलवान विद्यार्थ्यांचे केले कौतुक

केज : प्रतिनिधी

केज पोलीस ठाण्याचे पोलीस निरीक्षक राहुल सूर्यतळ यांनी जिवाजीवाडी व तुकुचीवाडी येथे गावकऱ्यांसोबत बैठक घेऊन सामाजिक, शैक्षणिक तसेच कायदा-सुव्यवस्थेशी संबंधित विविध विषयांवर मार्गदर्शन केले. गावातील सामाजिक कार्यक्रमांवर मोठ्या प्रमाणात खर्च करण्याऐवजी विद्यार्थ्यांच्या शिक्षणासाठी आणि त्यांच्या उज्ज्वल भविष्यासाठी खर्च करा, असे आवाहन त्यांनी केले.

पीआय राहुल सूर्यतळ यांनी सांगितले की, डॉ. बाबासाहेब आंबेडकर आणि लोकनेते गोपीनाथ मुंडे यांसारख्या महापुरुषांचा आदर्श घेऊन पुढील पिढी अधिक सुशिक्षित व सक्षम करण्यासाठी गावकऱ्यांनी प्रयत्न करावेत. शिक्षणाच्या माध्यमातून मुलांचे भविष्य घडविणे ही पालक आणि समाजाची जबाबदारी असून, विद्यार्थ्यांनी विविध शैक्षणिक क्षेत्रात प्रगती करावी यासाठी पालकांनी विशेष लक्ष द्यावे, असेही त्यांनी सांगितले.

अवैध धंद्यांबाबत पोलिसांना माहिती देण्याचे आवाहन

गावात अवैध दारूविक्री, गुटखा, जुगार किंवा अन्य बेकायदेशीर व्यवसाय सुरू असल्यास नागरिकांनी घाबरून न जाता पोलिसांशी संपर्क साधावा. अशा प्रकारांची माहिती तातडीने पोलिसांना द्यावी तसेच शक्य असल्यास लेखी तक्रार करावी. तक्रारीच्या आधारे नियमानुसार योग्य ती कायदेशीर कारवाई केली जाईल, असे पीआय सूर्यतळ यांनी स्पष्ट केले.

यावेळी तुकुचीवाडीतील काही महिलांनी गावात सुरू असल्याचा आरोप असलेल्या अवैध दारूविक्रीबाबत पीआय सूर्यतळ यांच्याकडे तोंडी तक्रार केली. त्यावर त्यांनी महिलांना सविस्तर माहिती देऊन लेखी तक्रार करण्याचे आवाहन केले.

पैलवान विद्यार्थ्यांचे कौतुक

तुकुचीवाडी येथील काही युवक व विद्यार्थी कुस्ती क्षेत्रात कार्यरत असून, त्यांच्या कामगिरीचे पीआय राहुल सूर्यतळ यांनी कौतुक केले. ग्रामीण भागातील विद्यार्थ्यांनी शिक्षणासोबतच क्रीडा क्षेत्रातही प्रगती करून गावाचे नाव उज्ज्वल करावे, असे सांगत त्यांनी विद्यार्थ्यांना पुढील वाटचालीस शुभेच्छा दिल्या.

जिवाजीवाडी ग्रामपंचायत कार्यालयात गावकऱ्यांच्या वतीने पीआय राहुल सूर्यतळ यांचा सत्कार करण्यात आला. यावेळी बीट अंमलदार मुंडे, कागदे व शिंदे यांचाही सत्कार करण्यात आला. यावेळी सरपंच दीपक काळे, माजी सरपंच संजय नाना कुटे, ग्रामपंचायत सदस्य शिवाजी चौरे, युवा कार्यकर्ते भागवत चौरे, प्रभाकर चौरे पाटील, राजेभाऊ फुंदे, रमेश चौरे यांच्यासह ग्रामस्थ उपस्थित होते.

तुकुचीवाडी येथेही पीआय राहुल सूर्यतळ यांच्या मार्गदर्शनाखाली बैठक घेण्यात आली. या बैठकीचे नियोजन पिंटू महाराज चौरे यांच्या नियंत्रणाखाली गावकऱ्यांनी केले. बैठकीत गावातील सामाजिक, शैक्षणिक आणि कायदा-सुव्यवस्थेशी संबंधित विविध विषयांवर चर्चा करण्यात आली.

तरुण पिढीने व्यसनांपासून दूर राहून शिक्षण, क्रीडा आणि सामाजिक क्षेत्रात पुढे गेल्यास गावाचा सर्वांगीण विकास साधता येईल, असा संदेश या संवादातून देण्यात आला.