पिंपोडे | प्रतिनिधी :
वाठार पोलिसांनी इलेक्ट्रिक डीपी चोरीप्रकरणी कारवाई करत दोन आरोपींना जेरबंद केले असून, त्यांच्या ताब्यातून चोरीच्या सात डीपीमधील तांब्याच्या तारा असा एकूण २ लाख ४ हजार रुपये किमतीचा मुद्देमाल जप्त केला आहे.
नांदवळ, अरबवाडी, अनपटवाडी, देऊर आणि पिंपोडे खुर्द परिसरात इलेक्ट्रिक डीपी चोरीच्या घटना घडल्या होत्या. या प्रकरणांचा तपास करताना वाठार पोलिसांना या गुन्ह्यांचा छडा लावण्यात यश आले.
पोलीस अधीक्षक निखिल पिंगळे, अपर पोलीस अधीक्षक डॉ. वैशाली कडुकर आणि कोरेगाव उपविभागीय पोलीस अधिकारी राजश्री तेरणी यांच्या मार्गदर्शनाखाली ही कारवाई करण्यात आली. मालमत्तेविषयक गुन्हे उघडकीस आणण्याच्या अनुषंगाने पोलिसांना देण्यात आलेल्या सूचनांनुसार वाठार पोलीस ठाण्याचे प्रभारी अधिकारी सहायक पोलीस निरीक्षक सुशील भोसले यांच्या नेतृत्वाखाली पथकाने ही कारवाई केली.
या कारवाईत गहिनीनाथ सातव, नितीन भोसले, पोलीस हवालदार सर्जेराव सुळ, जितेंद्र शिंदे, सहदेव तुपे, अजय झुंजार, आनंदराव भोसले, धीरज यादव, प्रकाश चव्हाण, विवेक शिंदे, विठ्ठल काळे, प्रशांत गोरे, अधिक शेलार, प्रथमेश अलगुडे, एकनाथ सरगर, प्रतीक देशमुख आणि राहुल पवार आदी पोलीस अधिकारी व अंमलदारांनी सहभाग घेतला.
या प्रकरणाचा पुढील तपास पोलीस हवालदार सर्जेराव सुळ करीत आहेत.
दरम्यान, परिसरात मालमत्तेविषयक गुन्ह्यांबाबत संशयास्पद हालचाली किंवा माहिती आढळल्यास नागरिकांनी ती माहिती पोलिसांना गोपनीयपणे द्यावी, असे आवाहन वाठार पोलिसांकडून करण्यात आले आहे.
