लोहा | प्रतिनिधी
लोहा तालुक्यातील सुनेगाव तलाव येथे सुरू असलेल्या राज्यस्तरीय ड्रॅगन बोट अजिंक्यपद स्पर्धा २०२६-२७ला दुसऱ्या दिवशीही खेळाडू आणि प्रेक्षकांचा उत्स्फूर्त प्रतिसाद मिळाला. राज्यभरातून विविध जिल्ह्यांतील खेळाडू या स्पर्धेत सहभागी होत असून, रविवारी सुट्टीचा दिवस असल्याने लोहा शहरासह ग्रामीण भागातील नागरिकांनी मोठ्या संख्येने उपस्थित राहून स्पर्धेचा आनंद घेतला.
स्पर्धेच्या दुसऱ्या दिवशी लातूर, नांदेड, बीड आदी जिल्ह्यांतून मोठ्या संख्येने खेळाडूंनी सहभाग नोंदविला. खेळाडूंच्या उत्साहाला पालकांनीही मोठा प्रतिसाद देत त्यांचा उत्साह वाढविला. विविध जिल्ह्यांमधून आलेल्या संघांच्या सहभागामुळे सुनेगाव तलाव परिसरात क्रीडामय वातावरण निर्माण झाले होते.
रविवार असल्याने लोहा शहर तसेच तालुक्यातील ग्रामीण भागातील नागरिकांनी मोठ्या संख्येने उपस्थित राहून ड्रॅगन बोट स्पर्धेतील रोमांचक सामने पाहण्याचा आनंद घेतला. राज्यातील विविध भागांतून खेळाडू सहभागी होत असल्याने या स्पर्धेला व्यापक स्वरूप प्राप्त झाले आहे.
या स्पर्धेचे आयोजन अध्यक्ष टॉम जोसेफ आणि सचिव दिनेश मुंडे यांच्या नेतृत्वाखाली करण्यात आले आहे. कार्यक्रमाचे अध्यक्ष म्हणून मा. श्री. भैरवनाथ नाईकवाडी उपस्थित होते. तसेच मार्गदर्शक म्हणून लोहा-कंधार तालुक्याचे आमदार प्रताप पाटील चिखलीकर यांचे मार्गदर्शन लाभले.
कार्यक्रमाला प्रवीण पाटील चिखलीकर, प्रणिता ताई देवरे यांच्यासह विविध मान्यवरांची प्रमुख उपस्थिती होती. मान्यवरांच्या उपस्थितीने कार्यक्रमाची शोभा वाढली.
सुनेगाव तलावाच्या परिसरात सुरू असलेल्या या राज्यस्तरीय स्पर्धेमुळे लोहा तालुक्यातील क्रीडाप्रेमींमध्ये उत्साहाचे वातावरण असून, युवा खेळाडूंना आपले कौशल्य दाखविण्यासाठी या स्पर्धेच्या माध्यमातून मोठे व्यासपीठ उपलब्ध झाले आहे.
