श्रीगोंदा : प्रतिनिधी
श्रीगोंदा येथील रयत शिक्षण संस्थेच्या महाराजा जिवाजीराव शिंदे महाविद्यालयात रॅगिंग प्रतिबंधात्मक जनजागृती या विषयावर एक दिवसीय कार्यशाळा आयोजित करण्यात आली होती. अध्यक्षस्थानी महाविद्यालयाचे प्राचार्य डॉ. प्रकाश साळवे होते. ते म्हणाले की, महाविद्यालयात विद्यार्थ्यांचा सर्वांगीण विकास व्हावा. कुणीही कुणाच्या मनाला लागेल असे बोलू नये. रॅगिंगमुळे विद्यार्थ्यांच्या व्यक्तिमत्त्वावर गंभीर परिणाम होऊ शकतो म्हणून कुणी त्रास देत असेल तर प्रशासनाशी संपर्क साधावा. युवकांनी या वयात ध्येयवादी म्हणून आपले स्वप्न साकार करावे, असे आवाहन त्यांनी केले.
प्रमुख वक्ते म्हणून डॉ राहुल गायकवाड यांनी विद्यार्थ्यांना बहुमोल असे मार्गदर्शन केले. ते म्हणाले की, नवीन प्रवेशित विद्यार्थ्याला शारीरिक मानसिक त्रास देणे, जात ,धर्म ,भाषा, व्यंग यावरून विद्यार्थ्याला हिनवले जाणे, काहीही करायला भाग पाडणे, याचा समावेश रॅगिंगमध्ये होतो. रंगिंगमुळे विद्यार्थ्यांचे स्वप्नभंग होते. कुणीही कुणाला त्रास देऊ नये. आपण आपल्या आनंदासाठी जगूया. महाविद्यालयीन जीवन सुंदर आहे. आपले जीवन येथेच घडवूया. वाचन करून आपले जीवन यशस्वी करूया. असे विचार त्यांनी व्यक्त केले. प्रास्ताविक व कार्यक्रमाचे संयोजन शारीरिक शिक्षण संचालिका प्रा. कल्पना बागुल यांनी केले. या कार्यशाळेच्या उद्घाटन प्रसंगी डॉ. राजेंद्र ठाकरे ,डॉ. राजाराम कानडे, डॉ. सुप्रिया पवार आदी प्राध्यापक शिक्षकेतर सेवक उपस्थित होते. सूत्रसंचालन प्रा.
सिद्धार्थ बर्वे यांनी केले. आभार डॉ.हरिभाऊ वाघिरे यांनी मानले. या कार्यशाळेसाठी विद्यार्थी., विद्यार्थिनी मोठ्या संख्येने उपस्थित होते.
