सुहास टिंगरे यांच्या प्रभागातील कोट्यवधींचा विकासनिधी वळविल्याचा राष्ट्रवादीचा आरोप; माजी आमदार सुनील अण्णा टिंगरे यांच्या नेतृत्वाखाली आंदोलन
पुणे | प्रतिनिधी – अशोक चव्हाण
पुणे महानगरपालिकेतील भाजप आणि राष्ट्रवादी काँग्रेसमधील राजकीय संघर्ष आता विकासनिधीच्या मुद्द्यावरून अधिक तीव्र झाला आहे. राष्ट्रवादी काँग्रेसचे नगरसेवक सुहास टिंगरे यांच्या प्रभागातील सुमारे ₹11.5 ते ₹12 कोटींचा विकासनिधी इतर प्रभागाकडे वळविण्याचा निर्णय महापालिकेच्या स्थायी समितीच्या बैठकीत झाल्याने राष्ट्रवादी काँग्रेसने या निर्णयाला तीव्र विरोध केला आहे.
या पार्श्वभूमीवर माजी आमदार तथा राष्ट्रवादी काँग्रेसचे पुणे शहराध्यक्ष सुनील अण्णा टिंगरे यांच्या नेतृत्वाखाली महापालिका भवनात आंदोलन करण्यात आले. निधी कपात करून नागरिकांच्या विकासकामांवर परिणाम करू नये आणि संबंधित निधी पूर्ववत करावा, अशी मागणी राष्ट्रवादीकडून करण्यात आली.
चंद्रकांत पाटील यांच्या विरोधातील पत्रावर स्वाक्षरी केल्याने निधी कपातीचा आरोप
काही दिवसांपूर्वी राष्ट्रवादीचे नगरसेवक अमोल बालवडकर यांनी मंत्री चंद्रकांत पाटील यांच्या मतदारसंघातील विकासकामांच्या चौकशीची मागणी करणारे पत्र दिले होते. या पत्राला सुहास टिंगरे यांनी अनुमोदन म्हणून स्वाक्षरी केली होती. त्यानंतर टिंगरे यांच्या प्रभागातील विकासनिधी वळविण्यात आल्याने राष्ट्रवादीकडून हा निर्णय राजकीय दबावातून झाल्याचा आरोप करण्यात येत आहे.
मात्र, भाजपकडून या आरोपांना वेगळे स्पष्टीकरण देण्यात आले असून निधीवाटप आणि महापालिकेच्या कामकाजाच्या संदर्भात राष्ट्रवादीच्या भूमिकेवरही प्रश्न उपस्थित करण्यात आले आहेत. त्यामुळे या प्रकरणाला राजकीय रंग चढला आहे.
विकासकामांवर परिणाम होण्याची भीती
सुहास टिंगरे यांच्या म्हणण्यानुसार, या निधीतून समाजमंदिर, बुद्ध विहार, महिलांसाठी योगा हॉल, ज्येष्ठ नागरिकांसाठी विरंगुळा केंद्र तसेच तरुणांसाठी क्रीडांगणे यांसारखी नागरिकांच्या उपयोगाची कामे प्रस्तावित होती. निधी वळविल्यामुळे या कामांवर परिणाम होण्याची शक्यता व्यक्त करण्यात आली आहे.
दरम्यान, राष्ट्रवादी काँग्रेसचे शहराध्यक्ष सुनील अण्णा टिंगरे यांनी मुख्यमंत्री देवेंद्र फडणवीस यांना पत्र पाठवून निधीवाटपात न्याय मिळावा, अशी मागणी केली आहे. पुणे महापालिकेतील महायुतीतील अंतर्गत मतभेद या निमित्ताने पुन्हा एकदा समोर आले आहेत.
— अशोक चव्हाण
पुणे जिल्हा प्रतिनिधी
सारथी महाराष्ट्राचा
