मुक्ताईनगर | प्रतिनिधी
मुक्ताईनगर शहरातील प्रभाग क्रमांक १ मध्ये मोकाट डुकरांच्या वाढत्या संख्येमुळे नागरिक त्रस्त झाले असून, या समस्येवर तातडीने उपाययोजना करण्याची मागणी जोर धरू लागली आहे. प्रभागातील अंतर्गत गल्ल्या, कचराकुंड्यांचा परिसर तसेच मुख्य रस्त्यांवर दिवस-रात्र डुकरांचे कळप फिरताना दिसत असल्याने नागरिकांच्या दैनंदिन जीवनावर परिणाम होत आहे.
मोकाट डुकरांमुळे रस्त्यावरून ये-जा करणाऱ्या नागरिकांना तसेच वाहनचालकांना अडचणींचा सामना करावा लागत आहे. विशेषतः लहान मुले, महिला आणि ज्येष्ठ नागरिकांच्या सुरक्षिततेचा प्रश्न निर्माण झाला असून, पालिका प्रशासनाने या समस्येकडे गांभीर्याने लक्ष देण्याची मागणी नागरिकांकडून होत आहे.
डुकरांमुळे कचरा अस्ताव्यस्त होत असल्याने परिसरात दुर्गंधी पसरत असून स्वच्छतेचा प्रश्नही गंभीर बनला आहे. त्यामुळे नागरिकांच्या आरोग्यावर परिणाम होण्याची शक्यता व्यक्त केली जात आहे. डासांची उत्पत्ती आणि अस्वच्छतेमुळे विविध आजारांचा धोका वाढू शकतो, अशीही नागरिकांमध्ये चिंता आहे.
दरम्यान, या समस्येबाबत नगरपालिका प्रशासनाकडून प्रभावी कारवाई होत नसल्याने नागरिकांमध्ये नाराजी वाढत आहे. मुख्याधिकाऱ्यांनी प्रभाग क्रमांक १ मधील मोकाट डुकरांचा प्रश्न तातडीने सोडवण्यासाठी ठोस मोहीम राबवावी, अशी मागणी नागरिकांनी केली आहे.
दरम्यान, प्रशासनाच्या दुर्लक्षामागे कोणाचे हितसंबंध आहेत का? असा सवालही काही नागरिकांकडून उपस्थित केला जात आहे. प्रशासनाच्या भूमिकेबाबत परिसरात विविध चर्चा सुरू असल्या तरी, पैशांची देवाणघेवाण किंवा अन्य गैरप्रकार झाल्याच्या आरोपांची अधिकृत पुष्टी झालेली नाही. त्यामुळे प्रशासनाने या चर्चांबाबतही पारदर्शकता ठेवून नागरिकांच्या शंकांचे निरसन करावे, अशी मागणी होत आहे.
स्वच्छता अभियानाच्या पार्श्वभूमीवर प्रभागातील मोकाट डुकरांचा प्रश्न तातडीने मार्गी लावून नागरिकांना दिलासा द्यावा, अशी अपेक्षा नागरिकांकडून व्यक्त होत आहे.
