जर्मनीहून आलेल्या ‘नॅशनल एअरलाइन्स’च्या महाकाय विमानाचे जलतोफांच्या सलामीने स्वागत
कळंबोली | प्रतिनिधी :
पनवेलमधील दि. बा. पाटील नवी मुंबई आंतरराष्ट्रीय विमानतळाच्या हवाई मालवाहतूक सेवेला आणखी एक महत्त्वपूर्ण बळ मिळाले आहे. नॅशनल एअरलाइन्सचे बोईंग ७४७ एफ मालवाहू विमान जर्मनीतील फ्रँकफर्ट-हॅन या प्रमुख युरोपीय मालवाहतूक केंद्रावरून नवी मुंबई विमानतळावर दाखल झाले. विशेष म्हणजे, नवी मुंबई आंतरराष्ट्रीय विमानतळावर दाखल झालेले हे पहिले बोईंग ७४७ मालवाहू विमान ठरले आहे.
नॅशनल एअरलाइन्सच्या या ऐतिहासिक विमानाचे नवी मुंबई आंतरराष्ट्रीय विमानतळावर जलतोफांच्या सलामीने उत्साहात स्वागत करण्यात आले. मोठ्या प्रमाणातील मालवाहतूक घेऊन आलेल्या या महाकाय विमानाच्या आगमनामुळे नवी मुंबई विमानतळाच्या वाढत्या आंतरराष्ट्रीय हवाई मालवाहतूक सेवेला आणखी एक महत्त्वपूर्ण टप्पा गाठता आला आहे.
नॅशनल एअरलाइन्सच्या ताफ्यात बोईंग ७४७ मालवाहू विमानांचा समावेश असून, मोठ्या प्रमाणातील मालवाहतूक, मानवतावादी मदत तसेच विशेष प्रकारच्या मालवाहतुकीसाठी या विमानांचा वापर केला जातो. बोईंग ७४७ एफसारख्या महाकाय मालवाहू विमानाचे नवी मुंबई विमानतळावर आगमन हे विमानतळाची आंतरराष्ट्रीय कार्गो हब म्हणून वाढणारी क्षमता अधोरेखित करणारे मानले जात आहे.
नवी मुंबई विमानतळावर आंतरराष्ट्रीय मालवाहतूक सेवांचा विस्तार होत असल्याने आगामी काळात विविध देशांमधून मोठ्या मालवाहू विमानांची ये-जा वाढण्याची अपेक्षा आहे. यामुळे रायगड, नवी मुंबई, मुंबई आणि परिसरातील उद्योग, व्यापार तसेच लॉजिस्टिक्स क्षेत्राला मोठा फायदा होण्याची शक्यता व्यक्त केली जात आहे.
