कळंब | प्रतिनिधी
नॅशनल स्टुडंट्स युनियन ऑफ इंडिया (NSUI) तालुका कळंबच्या वतीने कळंब तहसीलदारांना निवेदन देऊन शहरात ‘शहीद भगतसिंग’ क्रीडा संकुल उभारण्यासह शेतकऱ्यांच्या बँक खात्यांमध्ये कर्जमाफीची रक्कम तात्काळ जमा करण्याची मागणी करण्यात आली.
कळंब तालुक्यात मोठ्या संख्येने विद्यार्थी व युवक पोलीस तसेच लष्करी भरतीची तयारी करीत आहेत. याशिवाय क्रिकेटसह विविध क्रीडा प्रकारांमध्ये सहभागी होणारे विद्यार्थी व क्रीडाप्रेमीही मोठ्या संख्येने आहेत. मात्र, शहरात अद्याप सुसज्ज क्रीडा संकुल उपलब्ध नसल्याने खेळाडू व भरतीची तयारी करणाऱ्या युवकांना अडचणींचा सामना करावा लागत असल्याचे NSUIने निवेदनात म्हटले आहे.
कळंबच्या आसपासच्या अनेक तालुक्यांच्या ठिकाणी भव्य क्रीडा संकुले उपलब्ध असताना कळंब शहरात सुसज्ज क्रीडा संकुल का नाही, असा सवालही संघटनेने उपस्थित केला. त्यामुळे स्थानिक युवक, विद्यार्थी आणि क्रीडाप्रेमींसाठी ‘शहीद भगतसिंग’ यांच्या नावाने सुसज्ज क्रीडा संकुल उभारण्यात यावे, अशी मागणी करण्यात आली.
यासोबतच कर्जमाफीच्या लाभार्थी शेतकऱ्यांच्या बँक खात्यांमध्ये कर्जमाफीची रक्कम तात्काळ जमा करावी, अशी मागणीही निवेदनातून करण्यात आली. कर्जमाफीबाबत सातत्याने मुदतवाढ व प्रतीक्षा सुरू असून, कोणाचे नाव लाभार्थी यादीत आहे तर कोणाचे नाही, याबाबत शेतकऱ्यांमध्ये संभ्रमाचे वातावरण असल्याचे NSUIने म्हटले आहे. अपुऱ्या पावसामुळे शेतकऱ्यांच्या अडचणी वाढल्या असून शासनाने पात्र लाभार्थ्यांच्या खात्यावर कर्जमाफीची रक्कम तातडीने जमा करावी, अशी मागणी करण्यात आली.
क्रीडा संकुलाच्या कामाचे आदेश दोन महिन्यांच्या आत जारी करावेत, अन्यथा NSUIच्या वतीने तीव्र आंदोलन करण्यात येईल, असा इशारा तालुकाध्यक्ष शुभम पिसे यांनी दिला.
यावेळी करण वानखेडे, बबलू वाघमारे, महादेव भिसेकर, समीर आडे, शुभम शेंडे, अंकुश शिंदे, विवेक दीडपाये, कुणाल खीरकर यांच्यासह NSUIचे कार्यकर्ते उपस्थित होते.
