आलापल्लीत ‘प्रगत काष्ठ प्रक्रिया व प्रशिक्षण केंद्रा’चे जिल्हाधिकारी अविश्यांत पंडा यांच्या हस्ते लोकार्पण!
गडचिरोली:जिल्हा नियोजन समिती गडचिरोलीच्या ‘नाविन्यपूर्ण योजना २०२४-२५’ अंतर्गत शासकीय आरागिरणी, आलापल्ली येथे उभारण्यात आलेल्या ‘प्रगत काष्ठ प्रक्रिया व प्रशिक्षण केंद्रा’चा लोकार्पण सोहळा मंगळवारी (२५ ऑगस्ट) रोजी थाटात संपन्न झाला. गडचिरोलीचे जिल्हाधिकारी अविश्यांत पंडा (भा.प्र.से.) यांच्या शुभहस्ते या प्रकल्पाचे उद्घाटन करण्यात आले. या प्रसंगी प्रादेशिक व्यवस्थापक सौ. दिव्यभारती (भा.व.से.),विभागीय व्यवस्थापक गणेश मोटकर, भामरगडचे उपसंवरक्षक शैलेश मीना,उप विभागीय अधिकारी प्रशांत पिसाळ, तहसीलदार बालाजी सोमवंशी,यांची प्रमुख उपस्थिती होती.
या प्रकल्पासाठी एकूण ३ कोटींचा अंदाजपत्रकीय आराखडा तयार करण्यात आला असून, १ कोटी ५९ लाख रुपयांच्या प्रशासकीय मान्यतेतून हे आधुनिक केंद्र उभारले गेले आहे. या अंतर्गत ई-निविदा प्रक्रियेद्वारे आधुनिक प्रशिक्षण केंद्र, काष्ठ प्रक्रिया केंद्र, कार्यालय आणि वाहनतळ उभारण्यात आले असून GeM पोर्टलवरून अत्याधुनिक मशिनरी खरेदी करून बसवण्यात आली आहे.
आलापल्ली व परिसरातील स्थानिक तरुणांना अत्याधुनिक काष्ठ प्रक्रियेचे मोफत प्रात्यक्षिक व कौशल्य विकास प्रशिक्षण दिले जाईल. यामुळे महिला आणि तरुणांना स्वतःचा उद्योग सुरू करण्यासाठी किंवा केंद्रात प्रत्यक्ष रोजगाराची संधी उपलब्ध होईल.विशेष म्हणजे स्थानिक स्तरावर उपलब्ध लाकडाचा वापर करून ‘कस्टमाइज्ड फर्निचर डिझाईन’ तयार केले जाईल. त्यामुळे वाहतूक खर्च वाचून कमी किंमतीत मजबूत व पर्यावरणपूरक फर्निचर मिळेल. एवढेच नव्हे तर जिल्ह्यातील शासकीय कार्यालये आणि शाळांसाठी लागणारे सर्व फर्निचर आता याच केंद्रातून पुरवले जाईल. यामुळे स्थानिक सुतार, कारागीर आणि लघुउद्योजकांना मोठी कामे मिळून त्यांच्या उत्पन्नात वाढ होईल.
विशेष म्हणजे या प्रशिक्षण केंद्रात मागील काही दिवसापासून मोठ्या प्रमाणात महिलांना रोजगार मिळाला आहे. सागवान लाकडापासून विविध वस्तू तयार करण्याचे काम त्यांच्याकडून केले जात आहे. त्यांना रोजगार मिळाल्यामुळे ते आत्मनिर्भर झाल्याचे त्यांनी सांगितले. यावेळी जिल्हाधिकाऱ्यांच्या हस्ते त्यांना शाल व पुष्पगुच्छ देऊन सत्कार देखील करण्यात आला.
’मेक इन डिस्ट्रिक्ट’ संकल्पना प्रत्यक्ष उतरणार
गडचिरोलीतील लाकूड आता बाहेर न जाता, इथेच त्यावर प्रक्रिया करून अंतिम वस्तू तयार केली जाईल. यामुळे जिल्ह्याचा पैसा जिल्ह्यातच राहील आणि स्थानिक अर्थव्यवस्थेला बळ मिळेल.या उपक्रमामुळे आलापल्ली परिसरातील वनसंपदेचा स्थानिक विकासासाठी योग्य वापर होणार असून, प्रशासनाच्या या निर्णयाचे स्थानिक नागरिकांनी व कामगारांनी जोरदार स्वागत केले आहे.
बॉक्स ——————–
जिल्हा नियोजन समितीच्या नाविन्यपूर्ण योजनेतून प्रशिक्षण केंद्र, काष्ठ प्रक्रिया केंद्र, कार्यालय आणि वाहनतळ उभारण्यात आले आहे. या माध्यमातून जिल्ह्यातील मौल्यवान सागवान लाकडापासून विविध वस्तू, तसेच फर्निचर तयार करण्यात येणार आहे. स्थानिकांना या माध्यमातून मोठ्या रोजगार देण्याचा प्रयत्न आहे.
-अविश्यांत पंडा, जिल्हाधिकारी गडचिरोली
