फलटण | प्रतिनिधी :
फलटण तालुक्यातील जिल्हा परिषद प्राथमिक शाळा, सासकल येथे शिक्षकांची कमतरता निर्माण झाल्याने विद्यार्थ्यांचे शैक्षणिक नुकसान होत असल्याची बाब समोर आली आहे. शाळेत इयत्ता पहिली ते सातवीपर्यंत एकूण १०२ विद्यार्थी शिक्षण घेत असून, सध्या शिक्षकांची संख्या अपुरी असल्याने विद्यार्थ्यांच्या शिक्षणावर परिणाम होत असल्याचे ग्रामस्थांकडून सांगण्यात येत आहे.
सासकल जिल्हा परिषद प्राथमिक शाळेत यापूर्वी एकूण पाच शिक्षक कार्यरत होते. मात्र, त्यापैकी एक मुख्याध्यापक आणि एक शिक्षक यांची बदली झाल्याने दोन पदे रिक्त झाली आहेत. त्यामुळे उर्वरित शिक्षकांवर अतिरिक्त शैक्षणिक जबाबदारी येत असून विद्यार्थ्यांना आवश्यक शैक्षणिक मार्गदर्शन मिळण्यात अडचणी निर्माण होत आहेत.
विद्यार्थ्यांचे शैक्षणिक नुकसान होऊ नये आणि शाळेतील अध्यापन व्यवस्था सुरळीत व्हावी, यासाठी एक वरिष्ठ मुख्याध्यापक आणि एक शिक्षक, असे दोन शिक्षक तातडीने नियुक्त करण्यात यावेत, अशी मागणी सासकल ग्रामस्थांकडून करण्यात आली आहे.
याबाबत जिल्हा परिषद प्राथमिक शाळा सासकल शाळा व्यवस्थापन समितीचे उपाध्यक्ष दिनेश दत्तात्रय मुळीक यांनी जिल्हा परिषद सातारा येथील संबंधित शिक्षण अधिकारी तसेच जिल्हा परिषदेच्या मुख्य कार्यकारी अधिकारी शनै नागराजन मॅडम, उपमुख्य कार्यकारी अधिकारी राहुल गावडे साहेब, ग्रामविकास मंत्री जयकुमार गोरे, फलटण तालुक्याचे आमदार सचिन कांबळे पाटील तसेच माजी खासदार रणजितसिंह नाईक निंबाळकर यांच्याकडे निवेदनाद्वारे मागणी केली आहे.
सासकल शाळेतील विद्यार्थ्यांचे शैक्षणिक नुकसान होऊ नये, यासाठी शिक्षण विभागाने या मागणीची तातडीने दखल घेऊन आवश्यक शिक्षकांची नियुक्ती करावी, अशी अपेक्षा ग्रामस्थ आणि पालकांकडून व्यक्त होत आहे.
