लोहा, प्रतिनिधी- हणमंत पांचाळ.
सह शिक्षक, सामाजिक कार्यकर्ते
आयु. बापूसाहेब माधवराव कापुरे यांना २०२६ चा तुफानातील दिवे हा पुरस्कार जाहीर झाला असून, दिनांक ३० ऑगस्ट रोजी रविवारी शंकराव चव्हाण प्रेक्षागृह नांदेड येथे अतिशय भव्य दिव्य अशा कार्यक्रमात या पुरस्काराचे वितरण होणार आहे.
युग कवी वामनदादा कर्डक आणि प्रताप सिंग दादा बोदडे यांच्या संयुक्त जयंती सोहळ्यानिमित्त हा पुरस्कार दरवर्षी समाजातील अनन्यसाधारण सामाजिक धार्मिक तथा विविध क्षेत्रातील कार्य करणाऱ्या व्यक्तींना प्रदान करुन गौरविण्यात येत असते. २०२६ हे २१ वे वर्ष असून, या कार्यक्रमाचे मुख्य संयोजक संजय दता निवडंगे हे आहेत.
बापूसाहेब माधवराव कापुरे यांनी आपल्या आयुष्यामध्ये शिक्षक म्हणून कार्य करत असताना त्यासोबत मिळालेल्या वेळामध्ये सामाजिक कार्यात नेहमी अग्रेसर राहून कार्य केले आहे. ते सध्या भारतीय बौद्ध महासभचे केंद्रीय शिक्षक देखील आहेत. तसेच समता सैनिक दलाच्या माध्यमातून डॉ. बाबासाहेब आंबेडकरांचे सैनिक म्हणून उत्तम असे कार्य करत असतात. स्मृतीशेष माधवराव कापुरे गुरुजी यांनी ही सामाजिक धार्मिक क्षेत्रात कार्य केले त्यांचा वारसा जपण्याचे काम आज ते करत आहेत.
त्यामुळे तुफानातील दिवे या पुरस्कार निवड समितीने त्यांच्या कार्याची दखल घेऊन २०२६ चा तुफानातील दिवे हा पुरस्कार जाहीर करून त्यांचे मनोबल वाढवून समाजातील इतर कार्यकर्त्यांसमोर आदर्श निर्माण केला आहे. त्यांना हा पुरस्कार जाहीर झाल्यापासून अभिनंदनचा वर्षाव होत आहे.
