१० महिलांचाही उत्स्फूर्त सहभाग; पाथरीतील युवकांनी सामाजिक बांधिलकी जपत दिले मानवसेवेचे उदाहरण
प्रतिनिधी अहमद अन्सारी पाथरी परभणी
पाथरी, दि. २८ ऑगस्ट : पैगंबर हजरत मोहम् मद (सल्ल.) यांच्या जन्मोत्सवानिमित्त अर्थात रबीउल अव्वलच्या पवित्र महिन्याचे औचित्य साधून, युथ मूव्हमेंट ऑफ महाराष्ट्र, पाथरीच्या वतीने दरवर्षीप्रमाणे यंदाही भव्य रक्तदान शिबिराचे आयोजन करण्यात आले. या रक्तदान शिबिराला पाथरी शहरातील युवकांचा उत्स्फूर्त प्रतिसाद लाभला असून, तब्बल २५१ रक्तदात्यांनी रक्तदान करून सामाजिक बांधिलकी जपली. यामध्ये १० महिलांचाही समावेश होता.
युथ मूव्हमेंट ऑफ महाराष्ट्रच्या वतीने रबीउल अव्वल महिन्याच्या निमित्ताने दरवर्षी संपूर्ण महाराष्ट्रातील विविध ठिकाणी रक्तदान शिबिरांचे आयोजन केले जाते. यंदाचे हे संस्थेचे १९ वे रक्तदान शिबिर होते.
रक्तदान शिबिराच्या आयोजनापूर्वी युथ मूव्हमेंट ऑफ महाराष्ट्र, पाथरीच्या युवकांनी शहरातील नागरिकांमध्ये रक्तदानाबाबत मोठ्या प्रमाणावर जनजागृती केली. विविध ठिकाणी कॉर्नर मीटिंग्स घेऊन रक्तदानाचे वैद्यकीय व सामाजिक महत्त्व, रक्तदानाचे फायदे तसेच गरजू रुग्णाचा जीव वाचविण्यासाठी रक्तदानाचे असलेले अनन्यसाधारण महत्त्व नागरिकांना समजावून सांगण्यात आले. तसेच सोशल मीडियाच्या माध्यमातूनही रक्तदान शिबिराची व्यापक प्रसिद्धी करण्यात आली. युवकांनी गेल्या अनेक दिवसांपासून या उपक्रमासाठी विशेष परिश्रम घेतले.
प्रशासन व पोलिसांकडून कौतुक
या रक्तदान शिबिराला पाथरीचे तहसीलदार यांनी भेट देऊन शिबिरातील विविध व्यवस्थांची बारकाईने पाहणी केली. शिबिराचे नियोजन, शिस्तबद्ध आयोजन आणि युवकांनी घेतलेल्या पुढाकाराचे त्यांनी कौतुक करून समाधान व्यक्त केले. तसेच पाथरी पोलीस ठाण्याच्या वतीने पोलीस कर्मचाऱ्याने शिबिराला भेट देऊन शिबिराचे शिस्तबद्ध व सुयोग्य नियोजन केल्याबद्दल आयोजकांचे अभिनंदन केले.
वर्षभर गरजूंना रक्ताची सेवा
युथ मूव्हमेंट ऑफ महाराष्ट्रचे कार्य केवळ वार्षिक रक्तदान शिबिरापुरते मर्यादित नसून, संस्थेच्या माध्यमातून वर्षभर गरजू रुग्णांना रक्त उपलब्ध करून देण्याचे कार्य केले जाते. विशेषतः थॅलेसेमियासारख्या आजाराने ग्रस्त असलेल्या मुलांना मोफत रक्त उपलब्ध करून देण्यासाठी संस्थेचे कार्य सातत्याने सुरू आहे.
युथ मूव्हमेंट ऑफ महाराष्ट्रचे रक्तदान व रक्तवितरणाचे नेटवर्क संपूर्ण महाराष्ट्रात विस्तारलेले असून, राज्यातील विविध प्रमुख शहरांमध्ये गरजू रुग्णांना रक्त उपलब्ध करून देण्यासाठी संस्थेच्या माध्यमातून मदत केली जाते.
यंदा संस्थेच्या वतीने २४ तास कार्यरत रक्तदान हेल्पलाइन क्रमांक 7841939191 जाहीर करण्यात आला असून, महाराष्ट्रातील गरजू रुग्णांना रक्ताची आवश्यकता असल्यास या क्रमांकावर संपर्क साधून रक्त उपलब्धतेसाठी मदत घेता येणार आहे.
सामाजिक उपक्रमांमध्येही युवकांचा पुढाकार
युथ मूव्हमेंट ऑफ महाराष्ट्र ही युवकांची सामाजिक व सेवाभावी संघटना असून, रक्तदानाच्या उपक्रमासोबतच राज्यभर विविध सामाजिक व जनजागृतीचे उपक्रम राबविले जातात. यामध्ये जुगारविरोधी तसेच व्यसनविरोधी जनजागृती अभियानांनाही विशेष महत्त्व देण्यात येते.
या रक्तदान शिबिराच्या यशस्वी आयोजनासाठी युथ मूव्हमेंट ऑफ महाराष्ट्र, पाथरीचे स्थानिक अध्यक्ष उबैद हाश्मी, शिबिराचे संयोजक शेख फुरकान तसेच जिल्हाध्यक्ष शेख मुफस्सिर यांनी विशेष परिश्रम घेतले. त्यांनी रक्तदान करणाऱ्या सर्व रक्तदात्यांचे, सहकार्य करणाऱ्या नागरिकांचे तसेच शिबिराच्या यशस्वी आयोजनासाठी परिश्रम घेणाऱ्या सर्व युवकांचे आभार मानले.
यापुढेही पाथरी शहरातील युवक युथ मूव्हमेंट ऑफ महाराष्ट्रच्या सामाजिक व सेवाभावी उपक्रमांना अशाच प्रकारे सहकार्य करतील आणि मानवसेवा व समाजहिताच्या कार्यात उत्स्फूर्तपणे सहभागी होतील, अशी अपेक्षाही आयोजकांनी व्यक्त केली.
