पुणे:
पुण्यातील वैष्णवी हगवणे प्रकरणाची शाई वाळत नाही तोच, पिंपरी-चिंचवडमधील वाकड परिसरातून आणखी एक संतापजनक घटना समोर आली आहे. हुंडाबळीच्या आरोपांनी संपूर्ण पिंपरी-चिंचवड शहर हादरले असून, शिल्पा गवारे यांच्या शंकास्पद मृत्यूने पुन्हा एकदा हुंडाबळीचा गंभीर प्रश्न ऐरणीवर आला आहे. दरम्यान, या प्रकरणाची गंभीर दखल घेत मुख्यमंत्री देवेंद्र फडणवीस यांनी मृत शिल्पा यांच्या कुटुंबीयांना थेट फोनवरून मोठा दिलासा दिला असून, हे खटला फास्ट ट्रॅक कोर्टात चालवून दोषींना कठोर शिक्षा मिळवून देण्याची ग्वाही दिली आहे.
मुख्यमंत्र्यांची कुटुंबीयांना मोठी ग्वाही
शिल्पा गवारे या पिंपरी-चिंचवडच्या भाजप नगरसेविका स्नेहा कलाटे यांच्या नणंद होत्या. रक्षाबंधनाच्या सणाचे औचित्य साधून नगरसेविका स्नेहा कलाटे यांनी मुख्यमंत्री देवेंद्र फडणवीस यांच्याशी संपर्क साधला आणि शिल्पाच्या मृत्यूस कारणीभूत असलेल्यांना कठोर शिक्षा मिळवून देण्याची मागणी केली. वाकड परिसरात अल्पावधीत अशा दोन धक्कादायक घटना घडल्यामुळे महिला सुरक्षेचा प्रश्न निर्माण झाला आहे.
असे त्यांनी मुख्यमंत्र्यांच्या निदर्शनास आणून दिले. यावर मुख्यमंत्री फडणवीस यांनी या प्रकरणाचा तपास वेगवान करून खटला फास्ट ट्रॅक न्यायालयात चालविला जाईल आणि दोषींवर कठोर कायदेशीर कारवाई केली जाईल, असे स्पष्ट आश्वासन दिले.
माहेरच्या कुटुंबीयांचे गंभीर आरोप
शिल्पा गवारे यांच्या मृत्यूस सासरच्या मंडळींचा अनन्वित छळ आणि हुंड्याची न संपणारी भूक कारणीभूत असल्याचा गंभीर आरोप माहेरच्या लोकांनी केला आहे. लग्नापासूनच पती सचिन गवारे, सासरे उत्तम गवारे, सासू संजीवनी गवारे आणि दीर संदीप गवारे यांच्याकडून शिल्पा यांना सातत्याने शारीरिक व मानसिक त्रास दिला जात होता.
कुटुंबीयांच्या दाव्यानुसार, मुलीच्या संसारासाठी माहेरच्यांनी दोन एकर जमीन, पतीच्या व्यवसायासाठी आर्थिक मदत आणि वेळोवेळी मोठ्या प्रमाणावर रोख रक्कम दिली. मात्र, तरीही सासरच्या मंडळींचा पैशांचा हव्यास कमी झाला नाही आणि याच लालसेपोटी शिल्पा यांचा घातपात करण्यात आल्याचा आरोप कुटुंबीयांनी केला आहे. याप्रकरणी वाकड पोलिसांनी तात्काळ कारवाई करत पतीसह चौघा आरोपींना बेड्या ठोकल्या असून, ही ‘आत्महत्या नसून घातपात आहे का?’ या दिशेने आता पोलीस तपासाला तीव्र वेग आला आहे.
