प्रतिनिधि – रोशन ओलोकार
सामूहिक वनहक्क क्षेत्रात वनसंवर्धनासाठी ग्रामस्थांचा उत्स्फूर्त सहभाग
चटवाबोड, धारणी | दि. २९ ऑगस्ट २०२६
सामूहिक वनहक्क व्यवस्थापनाअंतर्गत ग्रामसभा चटवाबोड यांच्या पुढाकारातून सामूहिक वनहक्क प्राप्त वनखंड क्रमांक ७०५ मध्ये श्रमदानातून ५०० वृक्षांची लागवड करण्यात आली. वनसंवर्धन आणि वनसंपत्तीचे शाश्वत व्यवस्थापन करण्याच्या उद्देशाने राबविण्यात आलेल्या या उपक्रमात ग्रामस्थांनी उत्स्फूर्त सहभाग नोंदविला.
या उपक्रमाची प्रेरणा ग्रामसभा रंगुबेली येथून मिळाली. सामूहिक वनहक्क व्यवस्थापनाअंतर्गत ग्रामसभा रंगुबेलीने मागील वर्षी वनखंड क्रमांक ५६६ मधून बांबूची कापणी (हार्वेस्टिंग) केली होती. वनसंपत्तीचा वापर करण्याबरोबरच तिचे संवर्धन, पुनर्लागवड आणि शाश्वत व्यवस्थापन करणे आवश्यक आहे, असा महत्त्वपूर्ण निर्णय ग्रामसभेने घेतला.
या निर्णयाची अंमलबजावणी करत ग्रामसभा रंगुबेलीने सोसोखेडा ग्रामसभेकडून ५०० बांबूची रोपे उपलब्ध करून घेत श्रमदानातून बांबूची लागवड केली होती. या उपक्रमातून प्रेरणा घेत ग्रामसभा चटवाबोडनेही आपल्या सामूहिक वनहक्क क्षेत्रात वृक्ष लागवडीचा उपक्रम हाती घेतला.
वृक्ष लागवड कार्यक्रमादरम्यान ग्रामस्थांनी सामूहिक श्रमदान करत वनक्षेत्रात ५०० रोपांची लागवड केली. या उपक्रमातून वनसंपत्तीचा वापर आणि संवर्धन यांचा समतोल राखत सामूहिक वनहक्क क्षेत्राचे शाश्वत व्यवस्थापन करण्याचा संदेश देण्यात आला.
या कार्यक्रमास CFRMC चे अध्यक्ष श्री. रघुलाल कस्देकर, ग्रामस्थ तसेच SPS (Samaj Pragati Sahayog) ची टीम उपस्थित होती. SPS कडून या संपूर्ण उपक्रमासाठी मार्गदर्शन व सहकार्य करण्यात आले.
ग्रामस्थांच्या सामूहिक सहभागातून राबविण्यात आलेला हा उपक्रम वनसंवर्धन, पर्यावरण संरक्षण आणि सामूहिक वनहक्क व्यवस्थापनाच्या दृष्टीने महत्त्वपूर्ण पाऊल मानला जात आहे. ग्रामसभा चटवाबोडने श्रमदानाच्या माध्यमातून घेतलेला हा पुढाकार इतर ग्रामसभांसाठीही प्रेरणादायी ठरत आहे.
“वनसंपत्तीचा शाश्वत वापर, संवर्धन आणि पुनर्निर्मिती हीच सामूहिक वनहक्क व्यवस्थापनाची दिशा” या विचाराला या उपक्रमातून बळ मिळाले आहे.
