सुरेंद्र सोनवणे, लोणी प्रतिनिधी :–धामणी (ता. आंबेगाव) येथील ग्रामदैवत श्री खंडोबा देवस्थान मंदिरात श्रावण पौर्णिमेनिमित्त भक्तिमय आणि उत्साहपूर्ण वातावरण पाहायला मिळाले. पारंपरिक वाद्यांचा निनाद, भंडाऱ्याची उधळण आणि ‘सदानंदाचा येळकोट’च्या जयघोषात श्री खंडोबा-बाणाईचा पारंपरिक शाही विवाह सोहळा मोठ्या थाटामाटात संपन्न झाला. या सोहळ्यासाठी पंचक्रोशीतील शेकडो भाविकांनी गर्दी केली होती.
श्रावण पौर्णिमेच्या पहाटे श्री खंडोबा मंदिरातील स्वयंभू सप्तशिवलिंगाचा अकरा जोडप्यांच्या हस्ते विधिवत रुद्राभिषेक व दुग्धाभिषेक करण्यात आला. त्यानंतर आरती करण्यात आली. सेवेकरी दादाभाऊ भगत, प्रभाकर भगत, सुभाष तांबे, शांताराम भगत, राजेश भगत, नामदेव भगत, अनिरुद्ध वाळूंज यांच्यासह महिला भाविकांनी सप्तशिवलिंग तसेच श्री खंडोबा-बाणाईच्या पंचधातूच्या मुखवट्यांना चंदनऊटीचा लेप लावून धार्मिक विधी पार पाडले.
विवाह सोहळ्यानिमित्त मंदिराच्या गाभाऱ्यात आकर्षक फुलांची सजावट करण्यात आली होती. खंडोबा-बाणाईच्या मुखवट्यांना आकर्षक वस्त्रालंकार, बाशिंग आणि मुंडावळ्या बांधून त्यांची विधिवत सजावट करण्यात आली. त्यानंतर वाद्यांच्या गजरात मुखवट्यांची मिरवणूक काढण्यात आली. सकाळी सहा वाजता ही मिरवणूक मंदिरात दाखल झाली.
मंदिराच्या प्रांगणात महिलांनी नवरदेव खंडोबाच्या मुखवट्याचे औक्षण करून स्वागत केले. त्यानंतर सनई, तुतारी आणि ढोलाच्या निनादात हिरवी साडी नेसवून अलंकारांनी सजवलेला बाणाईचा मुखवटा सेवेकरी मंडळींनी लग्नमंडपात आणला.
यानंतर मंगलाष्टकांना सुरुवात झाली. खंडोबा-बाणाईच्या मुखवट्यांवर फुलांच्या पाकळ्या, अक्षता आणि भंडारा उधळण्यात आला. फटाक्यांची आतषबाजी, ढोल-ताशांचा गजर आणि ‘सदानंदाचा येळकोट’च्या जयघोषाने संपूर्ण मंदिर परिसर दुमदुमून गेला. पारंपरिक धार्मिक विधींच्या साक्षीने खंडोबा-बाणाईचा विवाह सोहळा उत्साहात पार पडला. विवाहानंतर उपस्थित भाविक व वऱ्हाडी मंडळींना प्रसादाचे वाटप करण्यात आले.
या विवाह सोहळ्याचे पौरोहित्य प्रमोद देखणे, पोपट भोजने, गणपत भोजने, गणेश जारकड आणि भाऊ भोजने यांनी केले. यावेळी सेवेकरी, मानकरी, ग्रामस्थ तसेच पंचक्रोशीतील भाविक मोठ्या संख्येने उपस्थित होते. विशेषतः महिला भाविकांची उपस्थिती लक्षणीय होती.
दीपमाळ उभारणीच्या कामाला सुरुवात…
श्री खंडोबा मंदिराच्या दोन्ही महाद्वारांच्या बाजूला भव्य दगडी दीपमाळ उभारण्याच्या कामाचा शुभारंभही यावेळी करण्यात आला. आगामी चंपाषष्ठी उत्सवापूर्वी दीपमाळेचे काम पूर्ण करण्याचा मानस ग्रामस्थ व सेवेकरी मंडळींनी व्यक्त केला. त्यामुळे मंदिराच्या परिसराच्या सौंदर्यात आणखी भर पडणार असून, भाविकांसाठी हे नवे आकर्षण ठरणार आहे.
