भोकर (वार्ताहर):
भोकर तालुक्यातील पाळज येथील गणपती मंदिर संस्थान परिसरात मध्यरात्री अज्ञात चोरट्यांनी युनियन बँकेची शाखा आणि एटीएम फोडण्याचा धाडसी प्रयत्न केला. शनिवारी मध्यरात्री १२ ते ३ वाजेच्या सुमारास ही घटना घडली. अज्ञात चोरट्यांनी गॅस कटरच्या साहाय्याने बँकेचे शटर व एटीएमचे कुलूप कापून आत प्रवेश करण्याचा प्रयत्न केला. मात्र, यंत्रणा किंवा तांत्रिक अडचणींमुळे चोरट्यांचा हा प्रयत्न पूर्णपणे अयशस्वी ठरला, ज्यामुळे बँकेतील मोठी रोकड सुरक्षित राहिली. घटनेची माहिती मिळताच पोलिसांनी तात्काळ घटनास्थळी धाव घेऊन पाहणी केली आणि सुरक्षा व्यवस्थेचा आढावा घेतला. परिसरातील सीसीटीव्ही फुटेजच्या आधारे चोरांचा माग काढण्याचे काम सुरू असून, बँकेचे शाखा व्यवस्थापक गजेंद्रकुमार गोधावळे यांच्या फिर्यादीवरून भोकर पोलिसांत अज्ञात आरोपींविरुद्ध गुन्हा दाखल करण्यात आला आहे.
