शहादा,दि.०७
महाराष्ट्र राज्य शासनाच्या अल्पसंख्यांक विभाग योजनेअंतर्गत शहादा शहरातील दादावाडी परिसरात पेवर ब्लॉक बसवणे व शहरातील विविध ठिकाणी रस्ते व विकासकामांचे भूमिपूजन शहादा-तळोदा विधानसभेचे आमदार राजेश पाडवी यांच्या हस्ते उत्साहात पार पडले. धार्मिक व सामाजिक स्थळांच्या मूलभूत विकासासाठी सुमारे दोन कोटी रुपयांचा निधी आमदार पाडवी यांच्या पाठपुराव्यातून उपलब्ध झाल्याने जैन भाविक व शहादा शहरातील नागरिकांनी समाधान व्यक्त केले आहे.
शहादा शहरामधील डोंगरगाव रस्त्यालगत असलेल्या श्री जीन कुशल सूरि संस्थानाच्या ‘सुघोषा घंटा दादावाडी’ परिसर भागात पेवर ब्लॉक बसवणे व नवीन वसाहतींमधील रस्त्यांच्या सुमारे दोन कोटी रुपयांच्या कामांचा शुभारंभ करण्यात आला. पेवर ब्लॉक बसवल्यामुळे दादावाडी परिसर स्वच्छ, सुबक व आकर्षक दिसणार असून दर्शनासाठी येणाऱ्या सकल जैन समाज बांधवांसाठी प्रसन्न वातावरण निर्माण होणार आहे.या प्रसंगी भारतीय जनता पक्षाचे ज्येष्ठ नेते डॉ. कांतीलाल टाटिया, भाजप जिल्हा उपाध्यक्ष तथा प्राचार्य मकरंद पाटील, शहादा नगरपालिकेच्या उपनगराध्यक्ष सौ.माधवी मकरंद पाटील, श्री महावीर नागरी सहकारी पतसंस्थेचे संस्थापक चेअरमन रमेश चोरडिया, व्हाईस चेअरमन विनयचंद्र गांधी, पारस जैन, समतीलाल जैन, कचरूलाल नहाटा, प्रदीप नहाटा, नगरसेवक ज्ञानेश्वर चौधरी, बांधकाम सभापती संतोष वाल्हे, पाणीपुरवठा सभापती प्रदीप ठाकरे, नगरसेवक ललित छाजेड, सागर मराठे, महावीर पतसंस्थेचे चेअरमन समीर जैन, मोतीलाल जैन, भरत ओसवाल, दिलीप जैन, विनोद जैन यांच्यासह शहरातील राजकीय-सामाजिक कार्यकर्ते व सकल जैन समाजातील नागरिक मोठ्या संख्येने उपस्थित होते.यावेळी बोलताना आमदार राजेश पाडवी म्हणाले की, राज्य शासनाच्या अल्पसंख्यांक विभागाकडून धार्मिक व सामाजिक कामांसाठी मोठ्या प्रमाणावर निधी उपलब्ध करून दिला जात आहे. शहादा-तळोदा मतदार संघात जास्तीत जास्त निधी आणून विकासकामांना गती देण्याला आमचे प्राधान्य आहे. अल्पसंख्यांक विभागाच्या दीड ते दोन कोटी रुपयांच्या निधीतून दादावाडी परिसरात पेवर ब्लॉक व नवीन वसाहतींमधील रस्त्यांच्या कामाला सुरुवात झाली असून, यामुळे शहरातील धार्मिक व सामाजिक स्थळांचा कायापालट होण्यास मदत होईल.
