बहुमताचे राजकीय समीकरण असतानाही राहुलदादा कुल समर्थक कार्यकर्त्याची प्रतिनिधी म्हणून निवड; दौंड तालुक्यात चर्चेला उधाण
मळद | प्रतिनिधी
पुणे जिल्हा मध्यवर्ती सहकारी बँक मर्या., पुणेच्या संचालक मंडळ निवडणूक सन २०२६-२७ ते २०३१-३२ च्या पार्श्वभूमीवर मळद विकास सेवा सहकारी संस्था मर्या., मळद यांनी घेतलेल्या महत्त्वपूर्ण निर्णयामुळे दौंड तालुक्यातील सहकार आणि राजकीय क्षेत्रात चर्चेला उधाण आले आहे.
मळद विकास सेवा सोसायटीच्या वतीने पुणे जिल्हा मध्यवर्ती सहकारी बँकेच्या निवडणुकीसाठी मतदान करण्याकरिता श्री. शरद विलास जाधव यांची संस्थेचे प्रतिनिधी म्हणून निवड करण्यात आली आहे. यासंदर्भातील अधिकृत पत्र संस्थेच्या वतीने जिल्हा सहकारी निवडणूक अधिकारी तथा विभागीय सहनिबंधक, सहकारी संस्था, पुणे विभाग, पुणे यांच्याकडे सादर करण्यात आले आहे.
अधिकृत पत्रातून निवडीला दुजोरा
संस्थेने सादर केलेल्या पत्रामध्ये पुणे जिल्हा मध्यवर्ती सहकारी बँकेच्या आगामी संचालक मंडळ निवडणुकीसाठी संस्थेच्या मतदानाच्या अधिकाराकरिता शरद विलास जाधव यांना संचालक मंडळ/सर्वसाधारण सभा ठराव क्रमांक २७६, दिनांक ०१/०९/२०२६ अन्वये अधिकार देण्यात आल्याचे नमूद करण्यात आले आहे.
तसेच संबंधित ठरावाची व संस्था नोंदणी प्रमाणपत्राची सत्यप्रत जोडण्यात आल्याचेही पत्रात नमूद आहे. सदर प्रतिनिधी संस्थेचे सभासद असून थकबाकीदार नाहीत, असेही संस्थेने स्पष्ट केले आहे.
राजकीयदृष्ट्या निवडीचे महत्त्व
मळद विकास सेवा सोसायटीवर माजी आमदार रमेशआप्पा थोरात यांच्या गटाचे वर्चस्व असल्याचे राजकीय चित्र असताना, आमदार राहुलदादा कुल यांच्या विचारांचे आणि समर्थक म्हणून ओळख असलेले शरद विलास जाधव यांची PDCC बँक निवडणुकीसाठी प्रतिनिधी म्हणून निवड होणे ही बाब राजकीयदृष्ट्या लक्षवेधी ठरली आहे.
सोसायटीच्या स्थानिक राजकीय समीकरणात वेगवेगळ्या गटांचे प्रभावक्षेत्र असतानाही ही निवड झाल्याने दौंड तालुक्यातील सहकार क्षेत्रात विविध चर्चांना सुरुवात झाली आहे.
स्थानिक पातळीवरील राजकीय समन्वय, संपर्क आणि रणनीतीच्या माध्यमातून हे समीकरण साध्य करण्यात आल्याची चर्चा समर्थकांमध्ये आहे. विशेषतः ज्या संस्थेवर आपले बहुमत नाही, अशा ठिकाणी अंतर्गत गटबाजीमुळे आपल्या विचारांच्या कार्यकर्त्याला महत्त्वाच्या सहकारी बँकेच्या निवडणुकीसाठी प्रतिनिधित्व मिळवून देणे, ही राजकीयदृष्ट्या उल्लेखनीय बाब असल्याचे बोलले जात आहे.
PDCC बँक निवडणुकीकडे तालुक्याचे लक्ष
पुणे जिल्हा मध्यवर्ती सहकारी बँकेच्या निवडणुकीला जिल्ह्यातील सहकार क्षेत्रात मोठे महत्त्व आहे. त्यामुळे मळद विकास सेवा सोसायटीकडून झालेली ही प्रतिनिधी निवड आगामी निवडणुकीच्या पार्श्वभूमीवर महत्त्वाची मानली जात आहे.
एका बाजूला सोसायटीतील विद्यमान राजकीय बहुमताचे समीकरण आणि दुसऱ्या बाजूला PDCC बँक निवडणुकीसाठी झालेली शरद विलास जाधव यांची प्रतिनिधी म्हणून निवड, यामुळे दौंड तालुक्यातील सहकार राजकारणात नव्या समीकरणांची चर्चा सुरू झाली आहे.
आता या प्रतिनिधीच्या माध्यमातून PDCC बँक निवडणुकीत कोणत्या पद्धतीने मतदान होते आणि त्याचा दौंड तालुक्यातील आगामी सहकार राजकारणावर काय परिणाम होतो, याकडे सर्वांचे लक्ष लागले आहे.
मळदच्या या निर्णयामुळे दौंड तालुक्यातील सहकार क्षेत्रात राजकीय हालचालींना वेग आल्याचे चित्र असून, आगामी काळात या निर्णयाचे आणखी कोणते पडसाद उमटतात, हे पाहणे औत्सुक्याचे ठरणार आहे.
