लोणावळा | प्रतिनिधी
लोणावळ्यातील तुंगार्ली परिसरातील गोल्ड व्हॅली सेक्टर डी येथील एका भाड्याने चालविण्यात येणाऱ्या बंगल्यात कथितरित्या सुरू असलेल्या अवैध वेश्याव्यवसायावर लोणावळा शहर पोलिसांनी ३ सप्टेंबर रोजी धाड टाकून कारवाई केल्याची माहिती समोर आली आहे. या कारवाईत दोन पुरुष आणि एका महिलेला ताब्यात घेण्यात आले असून, दोन मुलींनाही संरक्षणाच्या दृष्टीने पोलिसांनी ताब्यात घेतल्याचे समजते.
पोलिसांना गोल्ड व्हॅली डी सेक्टरमधील एका बंगल्यात अवैध वेश्याव्यवसाय सुरू असल्याची माहिती मिळाली होती. त्यानुसार वरिष्ठ अधिकाऱ्यांच्या मार्गदर्शनाखाली लोणावळा शहर पोलिसांच्या पथकाने संबंधित बंगल्यावर छापा टाकला.
या कारवाईदरम्यान दोन पुरुष आणि एका महिलेला पोलिसांनी ताब्यात घेतले. तसेच तेथे आढळलेल्या दोन मुलींना त्यांच्या सुरक्षिततेच्या दृष्टीने ताब्यात घेण्यात आले.
त्यानंतर दोन्ही मुलींना न्यायालयासमोर हजर करण्यात आले. न्यायालयाच्या आदेशानुसार त्यांची वैद्यकीय तपासणी करण्यात आली असून, वैद्यकीय तपासणीनंतर दोन्ही मुलींना सुधारगृहात पाठविण्यात आल्याचे समजते.
ही कारवाई मावळ विभागाचे उपविभागीय पोलीस अधिकारी भूषण दत्तात्रय माने यांच्या मार्गदर्शनाखाली लोणावळा शहर पोलिसांच्या पथकाने केली.
दरम्यान, गोल्ड व्हॅलीसारख्या निवासी परिसरातील भाड्याच्या बंगल्यात अशा प्रकारचा कथित अवैध व्यवसाय सुरू असल्याचे समोर आल्याने परिसरात खळबळ उडाली आहे.
या प्रकरणामागे आणखी कोणाचा सहभाग आहे का? या व्यवसायाचे धागेदोरे कुठपर्यंत जोडलेले आहेत? तसेच यामागे कोणती यंत्रणा रॅकेट कार्यरत होती का? याचा तपास लोणावळा शहर पोलीस करीत आहेत.
पोलिसांच्या तपासातून या प्रकरणातील पुढील धक्कादायक माहिती समोर येण्याची शक्यता आहे.
